Tórt balabaqsha men 8 mektep, 16 qabatty turǵyn úı jylýsyz qalǵan. Budan tysqary úsh shaǵyn aýdanda osyndaı keleńsiz oqıǵalar tirkelgen. Oryn alǵan tótenshe jaǵdaıdan keıin oblys ákiminiń orynbasary Anton Fedıaev, qala ákimi Marat Tasmaǵanbetov, «Petropavl jylý jelileri» JShS-niń bas dırektory Igor Rybas shuǵyl túrde baspasóz máslıhatyn ótkizip, qysqa ázirliktiń oıdaǵydaı ótip jatqanyn habarlap, turǵyndardy sabyrǵa shaqyrýǵa, tynyshtandyrýǵa tyrysty.
Olardyń málimetterine qaraǵanda, jylý berý 25 qyrkúıekten bastalyp, 1061 kóp qabatty turǵyn úıdiń 732-si jylý júıesine qosylǵan. Jylý elektr ortalyǵyna 226 myń tonna kómir men 572 tonna mazýt qory jınaqtalǵan. Brıfıngte jer astyndaǵy jylý júıesi magıstralynyń zaqymdanyp, joldyń aıaqasty opyrylyp túsýine qysymnyń kóbeıtilgeni basty sebep retinde alǵa tartyldy. Qysym dástúrli 40 gradýstan 74 gradýsqa deıin kóterilip, saldarynan qubyrlardyń osal tustary syr berse kerek. Seriktestiktiń qyzmetin 68 myń jeke sektor men 2224 óndiristik, bıýdjettik, kommersııalyq abonentter tutynady. Alaıda Eýropa qaıta qurý jáne damý bankinen 4,5 mıllıard teńge nesıe alǵanyna, «Nurly jol» baǵdarlamasy boıynsha memlekettik demeýqarjy berilgenine qaramastan jylý taratatyn toraptyń 80 paıyzdaıy kúrdeli jóndeýdi qajet etedi.
Desek te, oblys ákimdiginde ótken otyrysta aımaq basshysy Qumar Aqsaqalov jylytý maýsymyna daıyndyqtyń syn kótermeıtinin atap kórsetti. «Jas órken» shaǵyn aýdany, Jambyl kóshesi, Jastar saraıy, «Sokol» saýda úıi mańyndaǵy kóp qabatty turǵyn úıler, «Ivýshka», «Solnyshko» balabaqshalary jylýsyz otyr. Tıisti basshylarǵa saqadaı-saı ázirlik sharalaryn 1 qazanǵa deıin aıaqtaý júktelgenimen, jylý kesteden keshiktirilip berilgen. Birqatar shaǵyn aýdandarda qalypty temperatýralyq rejim joq. Magıstraldy qubyrlar gıdravlıkalyq synaqtarǵa tótep bere almaǵan.
Qarajat shilde aıynda qoldaryńyzǵa tıdi. Jumysty eki aýysymda uıymdastyrý nege talap etilmedi? Ár úıge jylý berý kestesiniń túrlishe qurylýy da túsiniksiz. Sınoptıkterdiń qystyń erte túsetini jaıly eskertýine qulaq aspaýdyń, jalǵan sóıleýdiń aqyry osyndaı keleńsizdikterge soqtyryp otyr, deı kelip, Qumar Irgebaıuly jylytý maýsymyna tıisti baqylaý júrgizbegeni jáne daıyndyq jumystaryn qajetti deńgeıde uıymdastyrmaǵany úshin orynbasary A.Fedıaevke, qala ákimi M. Tasmaǵanbetovke sógis jarııalady. Oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Tasmurat Qatqadamovqa qyzmetine tolyq sáıkes emestigi eskertildi.
Otyrysta Ǵ.Músirepov aýdanynda kóp qabatty úılerden qazandyqtardy syrtqa shyǵarý sylbyr atqarylyp jatqany, Tımırıazev aýdanynda bıýdjettik uıymdar kómirmen tolyq qamtylmaǵany, Sergeevka qalasynda mádenıet úıine jylý qazandyǵy áli ornatylmaǵany atap kórsetilip, olqylyqtardy shuǵyl túzetý mindetteldi.
О́mir ESQALI,
«Egemen Qazaqstan»
Soltústik Qazaqstan oblysy
