– Biz kezekti robotty tehnıka festıvaliniń Aqtóbe jerinde ótip jatqanyna qýanyshtymyz. Elbasy Nursultan Nazarbaev halyqqa Joldaýynda adamı kapıtaldy damytý qajettigin basa aıtqan edi. Soǵan baılanysty oblysta robotty tehnıkany damytý – basym baǵyttardyń biri. Biz balalar shyǵarmashylyǵyn yntalandyrýdy jáne sol arqyly daryndylardy anyqtaýǵa tyrysamyz. Aqtóbede salynǵan jańa ǵımarattardyń birinde robottytehnıka jáne keme modeldeý úıirmesi jumys jasaı bastady. Biz muny «bulaq kórse kózin ashýdyń» bir joly dep túsinemiz. Festıval qyzmeti sátti bolsyn,–dedi halyqaralyq jıynnyń ashylý rásiminde Aqtóbe oblysynyń ákimi Berdibek Saparbaev.
Budan soń «KazRoboSport-2017» respýblıkalyq ǵylymı-tehnıkalyq jobalar konkýrsynyń fınaldyq týry márege jetti. Oǵan aımaqtyq irikteý týrnırleriniń jeńimpazdary, ıaǵnı elimizdegi jalpy bilim beretin mektepterden barlyǵy 141 bala qatysty. Fınaldyq kezdesýde robosporttyń bes túri – fýtbol, sýmo, syzyqpen júrý, kegelrıng jáne bıatlonnan baq synasty. Jekpe-jek saraıynyń keń zalynda atalǵan sport túrlerine shyǵarylǵan robottardyń is-qımylyna kópshilik qyzyǵýshylyqpen qarady. Aqyldy tehnıkanyń bul túrin mektep oqýshylary oılap taýyp, sol úshin arnaıy baǵdarlama engizgen. Robottardyń qımyl-qozǵalysy uıaly telefon qosymshasy arqyly basqarylady.
Saltanatty shara kezinde festıval qonaqtary – Reseıdegi robotty tehnıkadan bilim berý qaýymdastyǵynyń prezıdenti Maksım Vasılev, TMD elderinen jáne shetelden kelgen robotty tehnıka salasynyń sarapshylary el aımaqtaryndaǵy robotty tehnıkadan bilim beretin oqytýshylar zamanaýı robotty tehnıka ónimderiniń kórmesin tamashalady. Onda Lego jıyntyǵy, 3D-prınterler, kvadrokopterler men basqa da kóptegen ónimder bar.
Al Astana qalasyndaǵy gımnazııalardyń birinde oqıtyn Danıl Krýjevnıkov robototehnıka jasaýmen bir jyldan beri aınalysady. Ol úı jınaý jumystaryn bir ózi atqaratyn robot jasaýdy aldyna maqsat etip qoıypty. El chempıonatynyń aqtyq kezeńinde ol 40 mınýtta berilgen joldy asa joǵary jyldamdyqpen ótip, shynylardy qulatatyn mashına jasap shyǵardy.
«KazRobotics» bilim berý jáne sporttyq robotty tehnıka federasııasynyń prezıdenti Aıjan Jekeevanyń málimetinshe, «KazRobotics-2017» halyqaralyq robotty tehnıka festıvali aıasynda ótken ǵylymı-tehnıkalyq jobalar konkýrsynyń fınaldyq týrynda jalpykomandalyq esepte Qaraǵandy oblysy birinshi oryndy enshiledi. Ekinshi oryn – Aqtóbe oblysyna tıse, úshinshi orynǵa Batys Qazaqstan oblysynan kelgen órenderdiń jumysy laıyq dep tanyldy.
Temir QUSAIYN,
«Egemen Qazaqstan»
AQTО́BE
