Eldiń memlekettik tirkeý qyzmetiniń málimetinshe, Qyrǵyzstan prezıdenti saılaýyna 3 025 768 daýys berýshi qatysa alady.
Aıta keterligi, bıýlletenderde 13 úmitker kórsetilgen, alaıda Baqyt Torobaev pen Kamchybek Tashıev saılaýǵa qatysýǵa bas tartqandyǵyna baılanysty olardyń derekteri óshirilgen jáne olarǵa daýys berilmeıdi. Bul eldegi memleket basshysyn tańdaý úshin ótkizilgen jetinshi saılaý.
Saılaý ýchaskeleri búgin saǵat 20:00-ge deıin ashyq bolady. Sonymen qatar, Bishkektiń jergilikti ýaqyty boıynsha saǵat 10: 00-de Reseıde (Vladıvostok, Krasnoıarsk, Novosıbırsk, Ekaterınbýrg), Japonııada, Koreıada, Qytaıda (Pekın, Gýanchjoý), Malaızııada, Úndistanda, Pákistanda, Qazaqstanda (Astana, Almaty), Túrikmenstan, О́zbekstan jáne Tájikstanda ýchaskelik saılaý komıssııalary ashyldy. Bul týraly Qyrǵyzstan Syrtqy ister mınıstrliginiń baspasóz qyzmeti habarlady
Aıta keterligi, Prezıdent Almazbek Atambaev Bishkek qalasyndaǵy №5 kásiptik lıseı aýmaǵyndaǵy № 1209 ýchaskesinde saılaýǵa daýys berdi.
«Saılaýda kim jeńiske jetetinin eshkim bilmeıdi, halyq óziniń kóshbasshysyn tańdaıdy. Men úshin saılaý - bul mereke. Ony uıymdastyrý úshin kóp kúsh jumsadym, jáne biz ulttyq merekeni buzýǵa múmkindik bermeımiz», dedi Atambaev.
Al prezıdentikke úmitker Omýrbek Babanov saılaý ýchaskesinde BAQ-qa búgingi kúnniń mańyzdylyǵy týraly aıtyp berdi.
«Men ózgeristerge daýys berdim, óıtkeni bizdiń respýblıkamyz álemniń on damyǵan elderiniń biri bola alady. Daýys berý aıaqtalǵannan keıin bir saǵat ishinde kimniń jeńiske jetetindigi anyq bolady. Men saılaý ádiletti bolǵanyn qalaımyn. Men ózime senimdimin, óıtkeni men kóp adamdarmen kezdestim jáne qoǵamdyq pikir suraýlarynyń nátıjelerin kórdim. Keshke jańa prezıdenttiń esimi belgili bolady. Barlyǵyn halyq tańdaıdy. Búgin mańyzdy kún, sondyqtan jaǵymdy nárseler týraly áńgimeleseıik. Halyq jeńiske jetýi kerek», dedi O.Babanov.
Esterińizge sala keteıik, saǵat 10.00-degi aqparat boıynsha, barlyǵy 226 616 adam daýys berdi, dep habarlady Qyrǵyzstan OSK baspasóz qyzmeti.
Memleket basshysynyń laýazymyna úmitkerler: Ernıs Zarlykov, Toktaıym Ýmótalıeva, Temır Sarıev, Ýlýkbek Kochkorov, Taalatbek Masadykov, Omýrbek Babanov, Arstanbek Abdyldaev, Sooronbaı Jeenbekov, Adahan Madýmarov, Arslanbek Malıev.
