Aımaq basshysy tolyq formattaǵy kásipkerlerge qyzmet kórsetý ortalyǵynyń jumysymen arnaıy tanysty. Bul týraly oblys ákiminiń baspasóz qyzmeti habarlady.
Oblys ákimi Danıal Axmetovtyń tapsyrmasy boıynsha kásipkerler palatasy men «Damý» qory negizinde qurylǵan ortalyqta 8 túrli servıstik qyzmet kórsetiledi. Eń bastysy, munda barlyq salalyq jáne memlekettik organdardyń ókilderi bar. Olar endi máseleni shuǵyl sheship qana qoımaı, ruqsat jáne texnıkalyq qujattardy berý isimen de aınalysady. Sondaı-aq, «Bıznes mektebi» men «Kezekshi prokýror» da jumys isteıdi.
«Bızneske qajettiniń bárin bir jerge shoǵyrlandyrdyq. Munda jer qatynastary komıtetiniń ókilderi, sý, jylý, káriz júıesi, elektr energııasy sııaqty ınfraqurylym qyzmeti ókilderi de jumys isteıdi. Keden departamenti de bar. Bir kúnnen keıin salyq, ádilet basqarmalary men memlekettik-jekemenshik seriktestik ortalyǵynyń mamandary da bolady. Ary-beri júrmeı, osy jerden máselesin sheship, suraqtaryna jaýap alýǵa barlyq jaǵdaı jasaldy», - deıdi D.Ahmetov.
Kezdesý barysynda aımaqtyń kommýnıkasııalary men jer ýchaskeleriniń ınteraktıvti kartasy kórsetildi. Aldaǵy ýaqytta dál osyndaı ortalyq Semeıde de ashylady. ShQO kásipkerler palatasy dırektory Igor Shaskııdiń aıtýynsha, oǵan qajetti resýrstar men ǵımarat daıyn.
Azamat QASYM,
«Egemen Qazaqstan»
О́SKEMEN
