Ortalyq saılaý komıssııasynyń tóraıymy Nurjan Shaıldabekovanyń málimeti boıynsha, elde 2375 ýchaskelik saılaý komıssııasy uıymdastyryldy. Bul jerlerde 5370 avtomattandyrylǵan sanaý jáshikteri jumys istedi. Budan bólek, shet memleketterde 37 saılaý ýchaskesi daýys berýge quqy bar el azamattaryna qyzmet kórsetti.
Mysaly, Reseıdiń alty, Germanııanyń úsh qalasynda, sondaı-aq Japonııa, Ońtústik Koreıa, Qytaı, Malaızııa, Úndistan, Pákistan, Birikken Arab Ámirlikteri, Túrikmenstan, О́zbekstan, Tájikstan jáne Qazaqstanda saılaý ýchaskeleri daýys berýshilerge esik ashty.
Keshe gazetimizdiń osy nómiri qattalyp jatqan kezde, qyrǵyz OSK-niń málimeti boıynsha, 15 qazan kúni saǵat keshki beske deıin el turǵyndarynyń 1213803-i daýys berdi. Bul saılaýshylardyń 40,12 paıyzyn quraıdy.
Eske salsaq, Qyrǵyzstandaǵy Prezıdent saılaýynda baq synaýǵa bastapqyda 59 úmitker nıet bildirgen bolatyn. Biraq Qyrǵyzstan OSK-niń sheshimimen saılaýǵa 13 úmitker ǵana jiberildi. Keıin úmitkerler Baqyt Torobaev pen Kamchybek Tashıev óz erikterimen saılaý dodasynan basta tartty da, qyrǵyz halqy 11 kandıdattyń ishinen ózi qalaǵan kandıdatqa daýys berdi.
Úmitkerdiń sany 11 bolǵanymen, sarapshylar atap ótkendeı, tartys negizinen eki kandıdat arasynda ótti. Sonyń biri – Sooronbaı Jeenbekov Bishkektegi №5 mektep-gımnazııada ornalasqan №1327 ýchaskede daýys berdi. «Men búgin elimizdiń damýy, respýblıkanyń bolashaǵy úshin daýys berdim. Aldymyzda kóptegen reformalar kútip tur. Eger biz óz kúshimizge senbegen bolsaq, onda bul saılaýǵa túspes edik. Bárin de halyq sheshedi», dep atap ótti ol BAQ ókilderimen suhbat barysynda.
Sooronboı Jeenbekovtiń basty qarsylasy Omýrbek Babanov bolsa, otbasymen kelip, el astanasyndaǵy №70 gımnazııadaǵy №1216 saılaý ýchaskesinde óz tańdaýyn jasady. Daýys bergennen keıin úmitker BAQ ókilderine bergen suhbatynda bylaı dedi: «Halqym óziniń durys jolyn tańdaıdy dep úlken úmitpen jáne zor qurmetpen kútetin bolamyn. Búgin bárin de halyq sheshedi. 15 qazan Qyrǵyzstan tarıhynda altyn áriptermen jazylatyn kún bolady».
Qyrǵyzstandaǵy saılaýdy álemniń 58 elinen kelgen 700-den astam baıqaýshylar qadaǵalady. Ázirge bizge jetken málimetterge qaraǵanda, saılaý barysynda óreskel zańbuzýshylyqtar oryn ala qoımaǵan. Atalǵan saılaýǵa BAQ tarapynan da qyzyǵýshylyq zor boldy. Bul saıası sharanyń ótý barysy týraly jergilikti jýrnalısterdi qospaǵanda, sheteldiń 35 buqaralyq aqparat quraly dúnıeniń túkpir-túkpirine málimet taratty.
Saılaý aldynda Qyrǵyzstannyń memlekettik tirkeý qyzmeti bul sharaǵa 3 025 768 adam daýys berýge múmkindik aldy dep habarlaǵan bolatyn. Bul tizimge el ishindegi 2 908 453 turǵyn jáne shet memleketterde turatyn 18 580 qyrǵyzstandyq enedi.
Qaırat ÁBILDA,
«Egemen Qazaqstan»
