Respýblıka boıynsha alǵashqylardyń biri bolyp uıymdastyrylǵan jıynǵa Mańǵystaý oblysynyń ákimi Eraly Toǵjanov, Mádenıet jáne sport mınıstrligi Tilderdi damytý jáne qoǵamdyq-saıası jumys komıteti tóraǵasynyń orynbasary Ǵalymjan Meldeshov, A.Baıtursynuly atyndaǵy Til bilimi ınstıtýtynyń dırektory, Ulttyq komıssııa tóraǵasy Erden Qajybek jáne til tizginin ustaǵan bilikti mamandar men jergilikti zııaly qaýym ókilderi qatysty.
Jıynǵa qatysýshylar kúni keshe Elbasy Nursultan Nazarbaevqa usynylǵan latyn álipbıiniń jańa nusqasyn keńinen talqylap, jobaǵa qatysty óz oılaryn ortaǵa saldy. Sonymen qatar Túrkııa, Ázerbaıjannan arnaıy shaqyrylǵan ǵalymdar latyn álipbıine kóshýdiń artyqshylyqtary men tıimdi tustaryna toqtalyp, tájirıbelerimen bólisti. Sebebi atalmysh qos memleket túrkitildes elder arasynda alǵashqy bolyp qarip aýystyrǵandardyń qatarynda. Sondaı-aq alqaly jıynda fılologııa ǵylymdarynyń doktory Quralaı Kúderınova «Jańa qazaq álipbıi – ulttyq strategııalyq maqsat» atty ǵylymı baıandama jasady. Sharanyń negizgi maqsaty – Memleket basshysynyń «Bolashaqqa baǵdar: rýhanı jańǵyrý» maqalasyndaǵy latyn álipbıine kezeń-kezeńmen kóshý máselesin keńinen nasıhattaý, onyń mańyzdylyǵyn jetkizý, memlekettik til saıasatyn júzege asyrý.
Konferensııada sóz alǵan Mańǵystaý oblysynyń ákimi Eraly Toǵjanov: «Latyn álipbıine kóshý – memlekettik mańyzdy is, ulttyq múddege arnalǵan baǵdarlama. Negizgi meje – Máńgilik el. Elbasy N.Á.Nazarbaev 2014 jylǵy 17 qańtardaǵy Qazaqstan halqyna Joldaýynda «... Endi eshkim ózgerte almaıtyn bir aqıqat bar. Ana tilimiz Máńgilik Elimizben birge Máńgilik Til boldy! Ony daýdyń taqyryby emes, ulttyń uıytqysy ete bilgenimiz jón», dep aıtqandaı, álipbıdi ózgertý Máńgilik eldiń Máńgilik tili úshin qajet. Kózdegen maqsatqa jetýdiń joly – osy», dedi.
«Egemen-aqparat»
