«Energetıka mınıstrligi tórt baǵyt boıynsha halyqaralyq pavılondarǵa monıtorıng júrgizdi. Qazirgi kezde ákimdiktermen jáne kompanııalarmen tıisti jumystardy jalǵastyrýdamyz. 170-ke tarta kompanııa búginde iriktelgen tehnologııalarǵa baǵalaý júrgizýde. Osy oraıda naqty qandaı tehnologııany, qaı merzimde ári qarjylandyrýdyń qansha somasynda engizý múmkindigi de qaralýda. Bul jumysqa ákimdikter belsendi jumyldyrylǵan», dedi ol.
Departament basshysynyń sózine qaraǵanda, ákimdikter úshin «aqyldy qala» qaǵıdatyna negizdelgen tehnologııalar qyzyǵýshylyq týdyryp otyr. Ásirese ınfraqurylym, turǵyn úı-kommýnaldyq sharýashylyǵy, energııa únemdeýdi jaqsartýǵa múmkindik beretin aqparattyq-kommýnıkasııalyq tehnologııalar eskerilgen. «Atap aıtqanda, bul baǵyttaǵy jobalar baǵalaý rásimderinen ótýde. Qazan aıynyń sońyna deıin ákimdikter men kompanııalardan tehnologııalardyń naqty tizimi, sondaı-aq jol kartasy ázirlenýi tıis. Osynyń nátıjesinde naqty bir ákimdik pen kompanııa qaı tehnologııamen jumys isteıtinine jaýap alamyz», dedi Aınur Sospanova.
Basqosýda «QazTransOıl» UK» AQ Eksplýatasııa departamenti dırektorynyń orynbasary Sergeı Kostın halyqaralyq kórme kezinde Slovakııa pavılonynda tanystyrylǵan ekokapsýla synaqtan ótkiziletinin aıtty. «Biz EKSPO-2017 kórmesi aıasynda Energetıka mınıstrliginiń atynan sarapshylar tobynyń jumysyna qatysyp, barlyq pavılondardy aralap shyqtyq. Osylaısha pavılondardan kórgen tehnologııalardy ózimiz úshin iriktep aldyq. Máselen, Aýstrııa, Slovakııa sııaqty elder energetıka salasynda jaqsy tehnologııalaryn usyndy», dedi ol. Mamannyń aıtýynsha, sheteldikter bul qurylǵynyń qoldanystaǵy úlgilerin tanystyrǵan. Ony tas joldarda stasıonarlyq kommýnıkasııa, ıaǵnı jylý men elektr jaryǵynsyz paıdalana berýge bolady. Ekokapsýlany endi «QazTransOıl» AQ nysandarynda synaqtan ótkizý josparlanyp otyr. Sodan soń kúzet beketteri men telekommýnıkasııa jelisi tartylatyn jerlerde paıdalanylmaq. Bul úıler qandaı da bir apattyń aldyn alý jumystaryn stasıonarlyq elektr energııasy kózderinsiz júrgizýge múmkindik beredi eken.
Ashat RAIQUL,
«Egemen Qazaqstan»
