Qazaqstan óziniń bastamasymen TMD men Eýrazııalyq ekonomıkalyq odaqtyń quramyna kirdi. TMD sonaý 1991 jylǵy aýmaly-tókpeli ýaqytta qurylyp, óz deńgeıinde jumys istep kele jatyr. Al Qazaqstan Prezıdenti N.Nazarbaevtyń tikeleı bastamasymen qurylǵan Eýrazııalyq ekonomıkalyq odaq Elbasynyń kúsh salýymen ýaqyt ozǵan saıyn tolysyp, nyǵaıyp, halyqaralyq ekonomıkalyq daǵdarystar, qaıshylyqtar, sanksııalar zamanynda óz áleýetin kórsetýde.
Odaq qurylǵaly beri uıymǵa múshe elder ortaq múddege qyzmet etýge talpynyp keledi. Túrli bastamalar kóterilip, birqatar oılar aıtylyp, sonyń kópshiligi oryndaldy da. TMD-ǵa múshe memleketter basshylarynyń arasyndaǵy jaqsy qatynastar uıymynyń jumysyna oń yqpalyn tıgizýde.
Qazaqstan Prezıdenti Sochıde qazirgi álemdik kúrdeli ahýalda aımaqtyq uıym TMD-ny transformasııalaý, onyń jumysyna qan júgirtý, qabyldanǵan ortaq sheshimderge úkimetter jaýapkershiligin kúsheıtý máselesin taǵy da kóterip, óziniń el basqarý tájirıbesi men halyqaralyq isterdegi keń kózqarasy men tanymyn bildirip, shynaıy qamqorlyq turǵysynan sony pikirler men qundy usynystar jarııalady. Solardyń ishindegi eń bastysy – ózara ekonomıkalyq baılanystardy jańa deńgeıge kóterý, bıznes úshin erkin saýda máselesin naqty sheshýdi usyndy. Elbasy usynǵan jobalar júzege asyp jatsa, taýar aınalymy kóbeıip, onyń quny arzandaýyna naqty jol ashylatyny anyq.
Náýbat QALIEV,
L.N.Gýmılev atyndaǵy Eýrazııa ulttyq ýnıversıtetiniń professory, saıası ǵylymdar doktory
