Eńbekaqynyń tógilgen terge laıyq bolǵany, eńbektiń ádiletsiz baǵalanǵany da adamdardy únemi alańdatatyn negizgi másele. Árıne jumystyń bárin uıymdastyryp, barlyq jumys prosesine jaýap beretin birinshi basshynyń eńbekaqysy qol astyndaǵy qyzmetkerlerinen artyq bolýy ábden zańdy. Bul logıkalyq jaǵynan senimdi, bultartpaıtyn sheshim. Alaıda bizde osy jazylmaǵan, biraq ta buljymaı oryndalýǵa tıisti tártip barlyq jerde birdeı qoldanylmaıdy eken.
Jýyrda Májilistiń jalpy otyrysynda depýtat Marat Bopazov Premer-Mınıstr B.Saǵyntaevtyń atyna jurttyń bárin tań qaldyrǵan sensasııalyq jańalyǵy bar saýal joldady. Onda bylaı delingen: «Qazaqstan Respýblıkasy Úkimetiniń 2015 jylǵy 31 jeltoqsandaǵy №1158 qaýlysyna sáıkes «B» korpýsyndaǵy ákimshilik memlekettik qyzmetkerlerdiń eńbekaqylary 30 paıyzǵa ósti. Qazirgi tańda sany 213 adamdy quraıtyn, barlyq deńgeıindegi máslıhat hatshylary atalǵan qaýly sheńberine kirmeı qaldy. Olardyń alatyn jalaqylary máslıhat apparaty qyzmetkerlerinen tómen bolyp otyr».
Máslıhattar jumysyn reglamenttegen «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly 2001 jylǵy 23 qańtardaǵy №148 zańnyń 19-babynyń 4) tarmaǵynda máslıhat hatshysy «máslıhat apparatynyń qyzmetine basshylyq jasaıdy, onyń qyzmetshilerin qyzmetke taǵaıyndaıdy jáne qyzmetten bosatady» dep naqty jazylǵan. Demek «hatshy» degen aty bolmasa máslıhat hatshysy basshylyq laýazymǵa saılanǵan adam. Endi osy laýazymdy tulǵanyń óz qaraýyndaǵy qyzmetkerlerden eńbekaqyny az alatynyna tańdanbaı kórińiz.
Depýtat M.Bopazov bul másele 2016 jyly syıaqy berýdiń aıyrmasymen túzetilip otyrdy deıdi. Al 2017 jyly ondaı múmkindik bolmaǵan. Odan ári depýtat: «2017 jylǵy 18 qańtarda bul másele Qazaqstan Respýblıkasy Parlamenti Májilisiniń jalpy otyrysynda kóterilgen bolatyn, onyń barysynda Memlekettik qyzmet isteri jáne sybaılas jemqorlyqqa qarsy is-qımyl agenttiginiń ókili depýtattyq korpýsqa bul máseleniń sheshilýi qarastyrylýda dep habarlady. Al Ulttyq ekonomıka mınıstrligi atalǵan máseleni biletinin aıtyp, biraq máseleniń sheshimi 2018 jylǵa qaldyrylǵanyn jetkizgen», dedi depýtat. Biraq depýtat máseleni sheshý boıynsha áli kúnge Úkimet tarapynan eshqandaı shara qabyldanǵan joq deıdi. Demek jańa jyldyń bıýdjetine máslıhat hatshylarynyń eńbekaqysyn ósirý shyǵyndary engizilmegen. Bul sol, «jany ashymastyń qasynda basyń aýyrmasynnyń» keri sııaqty. О́zderiniń eńbekaqylary joǵary bolyp, bárine jetip turǵan bıik laýazymdy sheneýnikter máslıhat hatshysy eńbekaqysynyń az ekenine basyn aýyrtpaıtyny kórinip tur. Al eger sol mınıstrlerdiń óz eńbekaqysy qaramaǵyndaǵy departament nemese basqarma basshysynan az bolsa, endigi úlken daý shyǵaratyn edi.
Depýtat M.Bopazovtyń osynaý sáıkessizdikti aıtyp, Premer-Mınıstr B.Saǵyntaevtyń atyna joldaǵan saýalyn qoldap 27 depýtat qol qoıdy. Osyndaı sheshimge kelgen depýtattar joǵarydaǵy oqıǵanyń eshqandaı logıkaǵa jatpaıtyndyǵyna narazylyq bildirgendeı boldy. Úkimet bul máseleni ádil shesher degen úmit bar.
