Aıtýly sharaǵa joǵary oqý oryndary rektorlary, kórnekti ǵalymdar qatysyp, «Qozybaev oqýlary–2017: Qazaqstan jáne ýaqyttyń zamanaýı úndesýleri» degen halyqaralyq ǵylymı-tájirıbelik konferensııa ótkizdi. Odan ári «Derbes akademııalyq jáne basqarýshylyq jaǵdaıyndaǵy zamanaýı oqý ornynyń syndarly saıasaty» atty semınarǵa, plenarlyq otyrysqa jalǵasty.
SQMÝ rektorynyń mindetin atqarýshy Serik О́mirbaev óz sózinde Manash Qozybaevtyń eńbekteri men zertteýlerine toqtalyp, qazaq tarıhynyń beımálim syrlaryn, «aqtaqdaqtar betterin» ashýǵa qosqan zor úlesin, jas urpaqty otanshyldyqqa tárbıeleıtin ónege-taǵylymyn joǵary baǵalady. Tarıh ǵylymynyń doktorlary Hankeldi Ábjanov, Qadyrjan Ábýov jáne basqalary «Qozybaev oqýlarynyń» tanymdyq rolin, daryndy tulǵanyń táýelsizdik jyldary Qazaqstan tarıhyn jańasha zerdeleýde ónimdi eńbek etkenin atap ótti. Joǵary oqý oryndarynyń damýyna, ǵylymnyń órkendeýine eleýli úles qosqan ǵalymdar men professorlarǵa «Akademık Manash Qozybaev» medali tabys etildi.
Shara aıasynda Bilim jáne ǵylym mınıstrliginiń ókilderi óńir pedagogtarymen kezdesip, bilim berýdiń jańartylǵan baǵdarlamasyn túsindirdi.
Pogodın atyndaǵy orys drama teatrynda ótken saltanatty mereıtoıǵa Bilim jáne ǵylym mınıstri Erlan Saǵadıev qatysyp, Premer-Mınıstr Baqytjan Saǵyntaevtyń quttyqtaý hatyn oqyp berdi. Jańarý men jańǵyrý jolynda bıik belesterdi baǵyndyrǵan ýnıversıtet ujymyna shyǵarmashylyq tabystar tileı kelip, stýdentterge sapaly bilim, sanaly tárbıe berýde erekshelengen bir top professor-oqytýshylardy «Eńbek ardageri» medalimen, «Y. Altynsarın atyndaǵy», «Qazaqstan Respýblıkasynyń bilim berý isiniń qurmetti qyzmetkeri» tósbelgilerimen marapattady.
Jınalǵandarǵa aımaq basshysy Qumar Aqsaqalov jyly lebizin arnap, eńseli oqý ornynyń materıaldyq-tehnıkalyq bazasy nyǵaıǵanyn, Bolon prosesine, ýnıversıtetterdiń uly hartııasyna qosylǵaly sapalyq kórsetkishterdiń molaıa túskenin, álemdik bilim keńistiginiń ıntegrasııalaý úderisine bet túzegenin atap ótti. Ýnıversıtet qyzmetkerlerine qurmet gramotalar men alǵys hattar tabys etildi. Bir kezderi osynda bilgirlikpen basshylyq etken ál-Farabı atyndaǵy Qazaq Ulttyq ýnıversıteniniń rektory Ǵalymqaıyr Mutanovqa «Soltústik Qazaqstan oblysynyń qurmetti azamaty» ataǵy berildi. Bir top oqytýshy Ahmet Baıtursynov atyndaǵy ordenge, altyn, kúmis, qola medaldarǵa, Joǵary mektep ulttyq ǵylym akademııasynyń marapattaryna ıe boldy.
Ǵalymnyń jary Sara Qozybaeva stýdentterge arnaıy shákirtaqy taǵaıyndady.
О́mir Esqalı.
«Egemen Qazaqstan».
Soltústik Qazaqstan oblysy.
