«100 esim.el.kz» saıtyna 2000-nan astam qazaqstandyq óz oqıǵasyn jibergen, solardyń ishinen 302 úmitker tańdalǵanymen, úzdikter halyqtyń daýys berýi arqyly anyqtalady.
Spıkerdiń sózinshe daýys berýge usynylǵan 302 úmitker paıdalanýshylarǵa qolaıly bolý úshin óz qyzmet salalary boıynsha 6 bólimge ornalastyrylǵan.
«Olar mádenıet jáne óner – 32 adam, qoǵam – 83 adam, bıznes – 51 adam, medısına – 46 adam, ǵylym – 47 adam, sport – 43 adam. Biz daýys berýdi 18 qazan ıaǵnı, sársenbi kúni bastaımyz. Jáne halyqty Buqaralyq aqparat quraldary arqyly, áleýmettik jeliler arqyly kim qansha daýys jınaǵanyn ashyq túrde aqparattandyryp otyramyz. Daýys berýdiń qaıtalanbaýy úshin saıtqa tirkelý qarastyrylǵan. Ony birneshe tásilmen júzege asyrýǵa bolady. Birinshi tásil – elektrondy poshta arqyly tirkelý. Ol úshin «Logın» baǵanyna óz elektrondy poshtańyzdyń mekenjaıyn engizý qajet, osydan keıin paıdalanýshy óziniń e-maıly arqyly saıtqa tirkelgendigi týraly eskertý hat alady, ári qaraı avtorızasııa jasaıdy jáne daýys berýge kirisedi. Ekinshi tásil – áleýmettik jelilerdegi akkaýnttar arqyly avtorızasııa jasaý. Paıdalanýshylarǵa qolaıly bolý úshin bólimderdiń ishinde qatysýshylar alfavıt tártibinde ornalastyrylǵan. Bul rette, eger sýretti bassa, onda jańa qosymsha paraqta onyń «Tabysqa jetý tarıhy» ashylady. Paıdalanýshy ózi daýys bergisi kelgen úmitkerdi tańdaý kezinde sáıkesti batyrmany basý qajet, osydan keıin saıt «Sizdiń daýysyńyz qabyldandy» degen eskertý beredi. Alaıda, paıdalanýshynyń ár bólimnen eń kóp degende 3 úmitkerge daýys berý múmkindigi bar, bir úmitkerge tek 1 ret qana daýys beriledi. Qaıta daýys berý múmkin emes», dep atap ótti «Qazkontent» AQ Basqarma Tóraǵasy Evgenıı Kochetov.
Aıta ketetin taǵy bir jaıt, «Qazaqstannyń 100 jańa esimi» jobasyna daýys berý 10 qarasha kúni aıaqtalady.
