Almatylyq mamandar alyp megapolıstegi zııankestermen kúres máselesi únemi baqylaýda ekenin aıtady. Máselen bir ǵana kemirgishterdiń ózi árdaıym adamǵa jaqyn ómir súretindikten adam úshin asa qaýipti, tipti ólimge aparatyn túrli aýrýlardyń tasymaldaýshy oshaǵy bolyp sanalady. Olardyń alpystan astam túri adam men úı janýarlaryna qaýip tóndirip qana qoımaı, kóptegen ekonomıkalyq shyǵyndarǵa dýshar etedi. Eki jarym mıllıonnan astam turǵyny bar Almaty sııaqty úlken qalalarda zııankesterdi udaıy joıyp otyrý kóptegen juqpaly aýrýlardyń taralýynyń aldyn alatyn kórinedi.
– Úı jaılardyń aýlalarynda kezdesetin kemirgishter men dala kemirgishterin joıý maqsatynda zalalsyzdandyrý jumystaryna arnaıy 8 brıgada men 60 adam jumyldyryldy. Olardyń quramynda: vrach-epıdemıolog, parazıtolog, nusqaýshy dezınfektor sııaqty bilikti mamandar bar. Qalany kemirgishterden tazartýǵa arnaıy ýlanǵan bıdaı daqyldarynyń dánderimen qatar «Bromadıalon» preparaty qoldanylýda. Qalanyń Túrksib, Jetisý sııaqty úlken aýdandaryn zalalsyzdandyrý jumystarynyń kúzgi naýqany oıdaǵydaı aıaqtaldy. Qazirgi ýaqytta zalalsyzdandyrý jumystary Medeý, Alataý aýdandarynda jalǵasyn tabýda – deıdi Almaty qalasy boıynsha dezınfeksııa ortalyǵy fılıalynyń dırektory Esen Bekbosynov.
Zalalsyzdandyrý ortalyǵynyń dárigerleri men arnaıy mamandar qala jurtshylyǵyna saqtyq sharalaryn saqtaýdy, sanıtarlyq tazalyqqa zor jaýapkershilikpen qaraýdy qatań eskertedi. Qaı jerde tazalyq tolyq saqtalmaıdy, sol jerde túrli kemirgishter paıda bolýy ábden múmkin. «Barlyq turǵyn úı aýlalarynda, saýda oryndarynyń aýmaǵynda, óndiris oryndarynyń aımaqtarynda, barlyq júrgizilip jatqan qurylys jumystarynyń alańdarynda sanıtarlyq tazalyqqa muqııat kóńil bólý kerek» deıdi mamandar.
Arman OKTIаBR,
«Egemen Qazaqstan»
ALMATY
