Kúnbatys Alashorda ókimetiniń ortalyǵy bolǵan kóne Jympıty shaharynda ótken basqosýǵa aqyn, halyqaralyq «Shabyt» festıvaliniń laýreaty Qalqaman Sarın, ánshi, «Daryn» memlekettik jastar premııasynyń ıegeri Ibragım Eskendir, jáne Batys Qazaqstan, Aqtóbe, Atyraý men Mańǵystaý oblystarynyń jas kóshbasshylary arnaıy shaqyrylǵan eken.
Jıyndy quttyqtaý sózben ashqan Syrym aýdanynyń ákimi Tólegen Tóreǵalıev bıyl aýdanda Alash murasyn túgendeý baǵytynda júrgizilgen jumystar týraly aıtyp ótti. Jergilikti basshylyqtyń tikeleı qoldaýymen eki halyqaralyq jáne bir respýblıkalyq ekspedısııa júzege asty. Jympıtydaǵy Alash murajaıy jańǵyrtyldy, jańa jádigerlermen tolyqty. Osy jyldyń eń basty jańalyǵy, Syrym aýdanynyń ortalyǵy Qazaqstannyń qasıetti jerleriniń respýblıkalyq tizimine endi.
- Alash muratyn bir dataǵa, bir – eki kúnge baılap qoıýǵa bolmaıdy. Olaı etsek, tarıhqa da, bolashaqqa da qııanat bolady. Bul taqyryp kúndelikti sharalardyń kóleńkesinde qalyp qoımaýy kerek. Táýelsizdik Alash ıdeıasymen tynys alýy kerek. Alash ıdeıasy – ol, alash balasynyń júreginde. Alash amanatyna adal bolaıyq! Bizge buıyrǵan mindet – sol! Bul aqyn Qalqaman Sarınniń aıtqan sózi. Bizdiń oıymyzsha, aqynnyń osy bir aýyz sózi plenarlyq májilistiń mánine qyzmet etip tur, - dedi aýdan basshysy.
Forýmnyń kún tártibindegi máseleden bólek, óner, mádenıet taqyryptary, qazaq rýhanııatyndaǵy negizgi máseleler de keń talqyǵa tústi. Delegattar men aýdan qonaqtary S. Datuly atyndaǵy tarıhı ólketaný mýzeıimen, Alash saıabaǵy, Alash murajaıy, J. Dosmuhamedov atyndaǵy mekteptegi murajaı bólmesimen tanysty. Keshkilik Jympıty halyq teatry Jaısań Aqbaıdyń «Jansha» qoıylymyn qoıdy. Kún ánshi, «Daryn» memlekettik jastar premııasynyń ıegeri Ibragım Eskendirdiń konsertimen qorytyndylandy.
Qazbek QUTTYMURATULY,
«Egemen Qazaqstan»
Sýretti túsirgen Baýyrjan ShIRMEDINULY
