Konferensııany ashqan QazUÝ-dyń prorektory M.Búrkitbaev akademık Sultan Sartaevtyń zań ǵylymyna qosqan ólsheýsiz úlesi men qaıratkerlik bolmysyna aıyryqsha toqtalyp ótti. Álemdik mańyzy zor ǵylymı eńbekterimen zań ǵylymynyń qazynasyn baıyta otyryp, tek óz elimizde ǵana emes, TMD jáne alys shetelerde de zań-quqyq salasyndaǵy tanymal tulǵaǵa aınaldy. Ol kóptegen halyqaralyq sezder men sımpozıýmdardyń, konferensııalardyń qadirli qonaǵy hám belsendi qatysýshysy. Akademık S.Sartaev 500-den asa ǵylymı jáne ǵylymı-kópshilik jumystardyń, 30-dan asa monografııa men jınaqtardyń avtory. Toqsannyń tórine shyqsa da, qatardan qalmaı qyzmet etip, aıaýly altyn qazyǵy – QazUÝ-dyń ardagerler keńesin basqaryp otyr. Syr jaǵalaýynan túlep ushqan Sartaev adamnyń boıyndaǵy kisilik qasıetti bilimmen biriktire otyryp jetildirýdi danalyq muratyna aınaldyrǵan. Ol ózimen qanattas belgili ǵalymdarmen birge Qazaqstandaǵy zań ǵylymynyń irgetasyn qalasyp, memlekettik-quqyqtyq qurylymnyń damýyna zor úles qosty.
Konferensııaǵa memlekettik organdardyń ókilderi – Qazaqstan Respýblıkasy Prezıdenti Ákimshiligi basshysynyń orynbasary T.Donaqov, Konstıtýsııalyq Keńes tóraǵasy I.Rogov, Bas prokýror J.Asanov, Qazaqstannyń jáne shet memleketterdiń zań salasynyń ǵalymdary, ǵylymı-zertteý ınstıtýttarynyń mamandary, «Nur Otan» saıası partııasynyń jáne qoǵamdyq birlestikterdiń ókilderi qatysyp, Sultan Sartaevty 90 jyldyǵymen quttyqtap, jyly lebizderin bildirdi. Jıyn barysynda Sultan Sartaevtyń atyna Elbasy Nursultan Nazarbaevtyń atynan quttyqtaý hat oqyldy.
«Halqymyz ózińizdi Qazaqstan zań ǵylymynyń kórnekti ókili, ulaǵatty ustaz jáne belgili qoǵam qaıratkeri retinde qadirleıdi. Siz ondaǵan jyldar boıy joǵary oqý oryndarynda sabaq berip, basshylyq jasap, bolashaq zańgerler men osy salaǵa arnap ǵylymı kadrlar tárbıeledińiz. О́zińizdiń kemel bilimińiz ben mol tájirbıeńizdiń jáne zor abyroı-bedelińizdiń arqasynda elimizdiń Joǵarǵy Keńesiniń depýtaty bolyp, táýelsiz Qazaqstannyń memlekettik-quqyqtyq júıesin qalyptastyrý men damytý isine súbeli úlesińizdi qostyńyz. Sizdiń ónegeli eńbek jolyńyz ben el ıgiligine arnap atqarǵan isterińiz ósip kele jatqan urpaqtar úshin árdaıym jaqsy úlgi bolyp qala beredi dep oılaımyn. Myqty densaýlyq, baıandy baqyt, áýletińizge amandyq pen qut-bereke tileımin», delingen quttyqtaý hatta.
Konferensııa barysynda Sultan Sartaevtyń eńbekterindegi KSRO-nyń ydyraý úderisine bergen saıası-quqyqtyq baǵasy taldanyp, egemendi jáne táýelsiz Qazaqstannyń qalyptasýyna negiz bolǵan eńbekteriniń ǵylymı mańyzdy tustary atalyp ótti. Sultan Sartaevtyń eńbekteri stýdent jastardyń patrıottyq jáne ónegelik sanasy men tárbıesiniń qalyptasýyna da úlken áseri bar. Sondaı-aq shara barysynda Qazaqstan Respýblıkasyndaǵy memlekettik qurylystyń jáne quqyqtyq júıeniń damýyn, ony jetildirýdiń negizgi joldaryn jáne konstıtýsııalyq zańnama júıesin damytýdyń negizgi máseleleri de keńinen talqyǵa salyndy.
Aıgúl AHANBAIQYZY,
«Egemen Qazaqstan»
ALMATY
