Sýretti túsirgen: Rýfına TORPIShEVA
Jalpy, munaı-gaz, metallýrgııa, mashına jasaý, kólik tehnologııalary, tehnologııalyq mashınalar, standarttaý, metrologııa jáne sertıfıkattaý, kólikti paıdalaný, júk qozǵalysy men tasymaldaýdy uıymdastyrý salalary boıynsha maman daıarlaıtyn fakýltette 60-tan asa oqytýshy-ǵalymdar qyzmet etedi.
20 ınnovasııalyq patenti, 132-den astam ǵylymı jumystary jarııalanǵan fakýltet professorlarynyń biri Ábilhan Qaraqaev jýyrda «Qazaqstannyń eńbek sińirgen ónertapqyshy» atandy. Fakýltet dekany Qaırat Ábishevtiń aıtýynsha, jańa bilim júıesin oqyp-úırený úshin stýdentter Nazarbaev Ýnıversıtetinde, oqytýshylar Ulybrıtanııa, Japonııa, Sıngapýr elderinde bilimderin jetildirdi. Birqatar stýdentter Prezıdent shákirtaqysynyń ıegeri boldy. Mashına jasaý mamandyǵynyń stýdentteri Polshanyń Lıýblın tehnıkalyq ýnıversıtetine, metallýrgııa mamandyǵy boıynsha oqıtyn jastar Bolgarııanyń metallýrgııa ýnıversıtetine jiberilip, bilimderin jetildirdi. Sondaı-aq Chehııa, Latvııa men Reseıden shaqyrylǵan oqytýshylar sabaq beredi. Fakýltettiń oqytýshylyq áleýetin metallýrgııa kafedrasynyń professory A.Bogomolovtyń «Vılgelm Leıbnıs» medalimen nagradtalyp, aǵa oqytýshy A.Jaqypovtyń metallýrgııa salasyna arnalǵan jobasy úshin elimizdiń «Jas ǵalym» baıqaýynda 1-oryndy jeńip alǵanynan kórýge bolady.
Ýnıversıtettegi kásiptik aýdıtorııanyń ashylýyna kásiporyn dırektorynyń keńesshisi Oleg Tımoshov, oqý ortalyǵynyń jetekshisi Anastasııa Grıshına jáne fakýltet ǵalymdary men stýdentteri qatysty. Ekijaqty áriptestik aıasynda tıimdi oqý prosesin uıymdastyrý úshin qajetti jabdyqtar men aqparattyq-ádistemelik materıaldarmen qamtylǵan aýdıtorııa endi stýdentter úshin tájirıbelik sabaqqa arnalǵan alań qyzmetin atqarmaq.
Farıda BYQAI,
«Egemen Qazaqstan»
PAVLODAR
