Shara aıasynda eki el arasyndaǵy qoǵamdyq kelisimdi qamtamasyz etý men etnosaralyq qatynastar salasyndaǵy saıasatty júzege asyrý jáne qarym-qatynasty jaqsartý baǵytyndaǵy ózara is-qımyldardy uıymdastyrý tetikteri aıtyldy.
Resmı kezdesýdegi quttyqtaý sózinde D.Myńbaı eki el arasyndaǵy qarym-qatynas deńgeıiniń keleshegi kemel ekendigine toqtaldy.
«Bıyl Qazaqstan men Polshanyń dıplomatııalyq baılanys ornatqanyna 25 jyl tolady. Osy aralyqta bizdiń áriptestik qarym-qatynasymyz joǵary deńgeıde qalyptasyp, barlyq salada senimdi seriktestigimiz nyǵaıa tústi. Árıne, onyń basym bóligi saýda-ekonomıkalyq baǵyttarǵa negizdelgeni túsinikti. Sol sebepten de búgingi tańda Qazaqstanda polıak kapıtalynyń qatysýymen 100-den astam kásiporyn qyzmet etýde. Munyń ózi qos memleket arasyndaǵy ózara tıimdi ári strategııalyq baılanys ornaǵandyǵynyń aıqyn dáleli», dedi ol.
Sonymen qatar, Darhan Qamzabekuly qazirgi kezde Qazaqstan polıaktarynyń odaǵy barlyq óńirlerde qalypty jaǵdaıda jumys isteıtindigin tilge tıek etti.
«Odaq aıasyndaǵy ortalyqtarda polıak tili jeksenbilik mektepter arqyly oqytylady. Sol sııaqty eki memlekettiń arasyn bilim salasy da jalǵastyrýda. О́ıtkeni, osy kúnderi 800-den astam stýdentimiz Polsha elinde bilim nárimen sýsyndaýda. Bul úkimetaralyq áriptestik kelisimi negizinde júzege asýda. Sondyqtan da bizdiń baılanysymyz bilim salasynan basqa, mádenıet pen óner syndy ózge de salalar boıynsha jalǵasyn taýyp, dostyq peıildegi qarym-qatynasymyz nyǵaıa túsedi degen senimdemin», dedi D.Myńbaı.
О́z kezeginde sóz alǵan IIM men Polsha ákimshiliginiń memlekettik hatshysy – Repatrıasııalaý isi jónindegi komıssar S.Hvalek Polsha úshin Qazaqstan mańyzy joǵary seriktes el retinde moıyndalatyndyǵyn aıtty.
«Aǵymdaǵy jylda Polsha prezıdenti men Senattyń vıse-spıkeri jáne birneshe mınıstrdiń Qazaqstanǵa resmı saparmen kelýi meniń bul sózime aıqyn dálel bola alady. Sondaı-aq, bilim salasyndaǵy berik baılanysymyz ben Interpol jelisi baǵytyndaǵy seriktestigimiz de, oǵan qosa eki el arasyndaǵy sottalǵandardy berý jónindegi kelisim de taraptardyń salalyq qatynastaryn jandandyrý ústinde», dedi S.Hvalek.
Kezdesý qorytyndysynda taraptar qoǵamdyq kelisimdi nyǵaıtýdy kózdeıtin túrli sharalardy birlese uıymdastyrý máselelerin jan-jaqty talqylady.
Nurlybek DOSYBAI,
«Egemen Qazaqstan»
