Asa qamqor, erekshe meıirimdi Allanyń atymen bastaımyn!
Halqymyzdyń bı-sheshenderi men aqyn-jyraýlary da árqashan ósıetti sózderi men ǵıbratty tolǵaýlarynda, óleń-jyrlarynda ózara kelisimdi nasıhattaǵan. Maıqy bıdiń:
«Altaý ala bolsa, aýyzdaǵy ketedi,
Tórteý túgel bolsa, tóbedegi keledi», degen naqyl sózi qansha ǵasyr ótse de urpaqqa ónege.
Elbasynyń ıgi bastamasymen elimizde qalyptasqan dinaralyq tatýlyq, ultaralyq kelisim – shırek ǵasyrǵa tatıtyn táýelsiz elimizdiń jetken basty jetistikteriniń biri.
Rýhanı kelisim, ulttar men dástúrli dinder arasyndaǵy birlik – baǵa jetpes baılyǵymyz, al turaqtylyq – tuǵyrymyz. Búgingi berekeli kúnge birliktiń arqasynda jettik. Eldiń áleýmettik-ekomıkalyq kórsetkishi halyqtardyń ózara tatýlyǵy negizinde damı túsetini túsinikti. El basqarǵan parasatty basshylar qashan da birlik pen tatýlyqqa asa mán bergen.
Kúntizbemizge 18 qazannyń Rýhanı kelisim kúni retinde enýi – qazaq topyraǵyna beıbitshilik ornatyp, turaqty qoǵam qurý ıdeıasynan týǵan úlken bastama.
Allaǵa shúkir, biz álmısaqtan beri musylmanbyz. VIII ǵasyrda Ortalyq Azııaǵa, onyń ishinde qazaq topyraǵyna jetken Islam sol dáýirden beri halqymyzdyń júrer joly, memleketimizdiń rýhanı tiregi bolyp keledi.
Islam dini – beıbitshilik, amandyq degen uǵymdardy bildiredi. Alla taǵalanyń óziniń sońǵy elshisin jiberýdegi maqsaty qasıetti Qurannyń «Ánbııa» súresiniń 107-aıatynda bylaısha baıandalady: «Biz seni álemderge tek raqym etip qana jiberdik».
Rasynda, biz keshegi aýmaly zamanda qıyndyqqa tózip, synaqqa sabyr etip, azattyqtyń aq tańyn atyrǵan halyqpyz. Sondyqtan da táýelsizdik, birlik, beıbitshilik, tatýlyq – ultymyz úshin uly uǵym, qasterli sóz.
Ata-babalarymyzdyń asqaq armany men ór rýhynyń, ımanǵa berik musylmandyǵynyń arqasynda kelgen táýelsizdik – Allanyń bizge bergen syıy hám nyǵmeti. Jaratýshy Rabbymyzǵa sansyz shúkirler aıtamyz, egemendigimizben birge dinimiz de órkendep, elimizde eńseli meshitter men medreseler boı kóterdi, áleýmettik jaǵdaıymyz túzelip, ekonomıkamyz damý ústinde. Endeshe, halyqtyń ál-aýqatyn budan ári kóterý úshin bizge eń áýeli birlik aýadaı qajet. О́ıtkeni beıbitshilik – bizdiń baqytymyz ben baǵa jetpes baılyǵymyz.
Qazirgideı almaǵaıyp zamanda órkenıetter arasyndaǵy beıbit kelisimdi saqtaý – ózekti máselelerdiń biri. Osy turǵydan alǵanda, dinder arasyndaǵy únqatysýdy damytý – búkil álemdik jaýapkershilik. Táýelsiz Qazaqstannyń Tuńǵysh Prezıdenti Nursultan Ábishuly Nazarbaev dinniń qoǵamdaǵy mańyzdy rólin eskerip, ár úsh jyl saıyn Álemdik jáne dástúrli dinder kóshbasshylarynyń sezin ótkizýge uıytqy boldy. «Zaman kúnde ózgeredi, al dinimiz – máńgilik», degen qanatty sózdi aıtqan Elbasy álemdik dástúrli din kóshbasshylaryn bir ústel basyna jınap, ortaq maqsattar týraly salıqaly sóz aıtýǵa múmkindik týǵyzdy.
Islam dini memlekette, qoǵamda tynyshtyq, ádildik bolýyn kózdeıdi. Adamdy soǵan tárbıeleıdi. Olaı bolsa, biz taza dinı isterden ózge osyndaı uly murattardy da nysana etýimiz kerek. О́ıtkeni adam balasy qaıyrly da izgi amaldarymen ǵana Jaratýshyǵa jaqyndaıdy. Qasıetti Quranda: «Bir-birlerińe izgi isterde, taqýalyqta kómektesińder. Kúná jasaýǵa, dushpandyqqa járdemshi bolmańdar...» delingen. («Maıda» súresi, 2-aıat).
Alla taǵala halqymyzdyń birligi men berekesin arttyryp, táýelsizdigimizdi baıandy etkeı! Tilegimiz qabyl, muratymyz asyl bolǵaı! Ámın!
Erjan qajy MALǴAJYULY,
Qazaqstan musylmandary dinı
basqarmasynyń tóraǵasy,
bas múftı
