Aıtýly is-sharany aýdan ákimi B.Ysqaq ashyp, bereke birligi jarasqan aýyl halqy Prezıdenttiń rýhanı jańǵyrý ıdeıasynyń negizinde atqarǵan isine dán rızashylyǵyn bildirdi.
Memleket jáne qoǵam qaıratkeri K.Aýhadıev týǵan jerdi túletýdegi S.Esbergenovtiń ónegeli eńbegine toqtalyp, tyń jerdi túletken ákesiniń rýhyn ataqonysyna qaıta oraltyp, aýyl jurtyn serpiltken tekti jannyń urpaqtaryna alǵysyn jetkizdi. Al Almaty oblystyq Mádenıet, muraǵat jáne qujattama basqarmasynyń basshysy A.Ábdýálıev oblys kólemindegi týǵan jerge degen súıispenshilikten óris alyp jatqan isterdi sanamalaı kelip, sonyń biri osy eskertkish ekenin alǵa tartty. Aldaǵy ýaqytta qazaq halqynyń aıtýly aqyny T.Moldaǵalıevke de qurmet kórsetiletinin tilge tıek etip, mundaı jumystar jalǵasa beretinin eske saldy.
Al Májilis depýtaty Nurtaı Sabılıanov Elbasynyń rýhanı jańǵyrý ıdeıasyna saı atqarylǵan myna shara kimge de bolsa úlgi bolatynyn atap, eshkimnen esh nárse suramaı óz qarjysymen osynshama jumysty atqarǵan Esbergenov áýletine, zańger balasy Ulan Esbergenovke iltıpat tanytyp, qasiretti Jeltoqsan kóterilisinde ádildiktiń týyn kóterip, onyń ózine arasha túsip, buǵaýdan qutqarǵanyn alǵa tartyp, endi oılap otyrsa tektiden tekti týatynyna kóziniń jetkenin atap aıtty. Sol sekildi ardaqty azamat týraly K.О́mirǵalı, Á.Dáýitqulov, S.Baıbatyrov, E.Sultanǵazıev, taǵy basqalar estelikter aıtyp, irgeli aýyldyń ajaryn kirgizgen ıgilikti jumysqa alǵystaryn jetkizdi.
Saltanatty jıynnyń sońynda S.Esbergenovtiń jary, áýlet anasy Áıken apaı men uly Ulan búkil aýyl halqyna, tilektes jurtqa alǵystaryn bildirip, el jaqsysynyń zamandastaryna syı-sııapat jasady. Jınalǵan kópke onnan asa tigilgen qazaq úıde as berildi. Qaýmalaǵan halyq osynsha ıgilikti isti iske asyrǵan áýletke shyn nıetterin bildirip, endigi jerde eskertkish úlken-kishiniń qasıetti ornyna aınalatynyn, aldaǵy ýaqytta aýyz sý máselesi de sheshilse, nur ústine nur bolar edi degen tilekterin de jetkizip jatty. Ol da taıaý ýaqytta sheshimin tabatynyn basshylar men halyq qalaýlysy atap aıtty.
Súleımen MÁMET,
«Egemen Qazaqstan»
