Memleket basshysy rásimge qatysýshylarǵa arnalǵan sózinde olardyń dıplomatııalyq mıssııalary Qazaqstannyń jańa damý kezeńine tuspa-tus kelip otyrǵanyn atap ótti.
– Biz Qazaqstannyń Úshinshi jańǵyrýyn iske asyrýǵa kiristik. «Rýhanı jańǵyrý» atty aýqymdy baǵdarlama árbir azamatymyz úshin erekshe mánge ıe bolýda, – dedi Qazaqstan Prezıdenti.
Nursultan Nazarbaev Qazaqstanǵa ekonomıkalyq jáne ımıdjdik turǵydan oń áseri bolǵan Astanada ótken birqatar halyqaralyq is-sharalardyń nátıjelerine toqtaldy. Atap aıtqanda, halyqaralyq «EKSPO-2017» mamandandyrylǵan kórmesi, Shanhaı yntymaqtastyq uıymynyń sammıti, Astanadaǵy Tómen baıytylǵan ýran bankiniń ashylýy jáne Islam yntymaqtastyǵy uıymynyń Ǵylym jáne tehnologııalar jónindegi sammıti ótti.
Memleket basshysy Qazaqstannyń BUU-nyń Qaýipsizdik Keńesiniń turaqty emes múshesi retinde jahandyq beıbitshilik pen qaýipsizdikti qamtamasyz etý isine qosyp otyrǵan úlesin erekshe atap ótti.
Qazaqstan Prezıdenti elimizdiń sheteldik áriptestermen saýda-ekonomıkalyq qarym-qatynastardy nyǵaıtýǵa múddeli ekenin aıtyp, ınvestısııalyq ahýaldy jaqsartý úshin qabyldanyp jatqan sharalarǵa toqtaldy.
– Qazaqstanda Eýrazııalyq ekonomıkalyq odaqqa, Ortalyq Azııa men Qytaı naryǵyna shyǵatyn ınfraqurylym qalyptasty. Investorlarmen jáne bıznespen ózara tıimdi is-qımyl ornatý maqsatymen «Qazaq Invest» jáne «Qazaq Eksport» ulttyq kompanııalary quryldy. «Astana» halyqaralyq qarjy ortalyǵy, «Jasyl» tehnologııalardy damytý jónindegi BUU-nyń halyqaralyq ortalyǵy jáne IT-startaptardyń halyqaralyq tehnoparki jumysyn bastaýda, – dedi Nursultan Nazarbaev.
Memleket basshysy Qazaqstan men Aýǵanstan arasyndaǵy ózara saıası is-qımyldyń jandanǵanyna nazar aýdardy.
– Bıyl biz Ǵanı myrzamen Shanhaı yntymaqtastyq uıymy men Islam yntymaqtastyǵy uıymynyń jıyndarynda kezdestik. О́zara saýda kólemi jarty mıllıard dollarǵa jetip, Almaty men Kabýl qalalarynda Saýda úıleri ashyldy. Biz tehnıkalyq jáne gýmanıtarlyq kómek kórsetýdi jalǵastyratyn bolamyz. Aýǵanstannyń qaýipsiz ári ornyqty damýy – óńirimizdegi beıbitshiliktiń, turaqtylyq pen órkendeýdiń kepili, – dedi Qazaqstan Prezıdenti.
Nursultan Nazarbaev Qazaqstan Kanadamen kóp salaly yntymaqtastyqty odan ári nyǵaıtýǵa nıetti ekenin aıtty.
– О́tken jyly «G-20» sammıtindegi kezdesýde Premer-Mınıstr Djastın Trıýdomen túrli saladaǵy baılanystardy nyǵaıtý jóninde ýaǵdalastyq. Bıylǵy maýsym aıynda Astanada «Qazaqstan-Kanada» iskerlik keńesiniń ótýi – sol ýaǵdalastyqtyń naqty iske asyrylýynyń kórinisi, – dedi Memleket basshysy.
Qazaqstan Prezıdenti Belgııamen aradaǵy is-qımyl ózara qurmet pen senim qaǵıdattaryna negizdelgenin atap ótti.
– Meniń 2014 jylǵy qazandaǵy Brıýsselge jumys saparym jáne Joǵary Mártebeli Korol Fılıppen ótken kelissózder ekijaqty ári kópjaqty yntymaqtastyqtyń ózekti máseleleri jóninde pikir almasýǵa múmkindik berdi. Belgııa kapıtaly men tehnologııalaryn Qazaqstan naryǵyndaǵy birlesken jobalarǵa belsendi túrde tartýdy quptaımyz, – dedi Nursultan Nazarbaev.
Sondaı-aq, Memleket basshysy Polsha Respýblıkasy Ortalyq jáne Shyǵys Eýropadaǵy Qazaqstannyń negizgi seriktesi ekenin aıtty.
– 2016 jylǵy tamyzdaǵy Varshavaǵa memlekettik saparymnyń jáne Polsha Prezıdenti Andjeı Dýdanyń bıylǵy qyrkúıek aıynyń basyndaǵy Qazaqstanǵa memlekettik saparynyń qorytyndylaryn joǵary baǵalaımyn. О́tken kelissózder Qazaqstan men Polsha arasyndaǵy dıalogtyń áleýeti zor ekenin dáleldep, ózara tıimdi kóptegen jobalarǵa jol ashty, – dedi Qazaqstan Prezıdenti.
Sonymen qatar, Memleket basshysy elimizdiń Fınlıandııamen ózara is-qımyl deńgeıiniń joǵary ekenin atap ótti.
– Bizdiń el men Fınlıandııany dástúrli dostyq qatynastar men kóp jyldan bergi yntymaqtastyq baılanystyryp keledi. Astana men Helsınkı arasynda tikeleı áýe reısiniń ashylýy aıtýly oqıǵa boldy. «Jasyl» tehnologııalardy damytý jónindegi ortalyq quryldy, Qazaqstanda jańa fın kásiporyndary ashylýda. Joǵary jáne úkimetaralyq deńgeıdegi ýaǵdalastyqtardyń odan ári iske asyrylýyn qamtamasyz etý qajet, – dedi Nursultan Nazarbaev.
Memleket basshysy Qazaqstan men Fransııanyń ózara tıimdi yntymaqtastyǵyna toqtaldy.
– Mashına jasaý, ǵarysh, metallýrgııa, kólik jáne basqa da salalarda tehnologııalyq jobalar ázirlendi. Elderimizdiń ıgiligi úshin Fransııa Prezıdenti Makronmen jemisti baılanysty damytýǵa nıettimiz, – dedi Qazaqstan Prezıdenti. Nursultan Nazarbaev Estonııamen qarym-qatynasymyz qarqyndy damyp kele jatqanyn atap ótti.
– Biz kólik jáne tranzıt, energetıka, kommýnıkasııa jáne tehnologııalar sııaqty perspektıvaly baǵyttar boıynsha birlese jumys jasaýǵa ázirmiz. Eýropalyq odaqta tóraǵalyq etip otyrǵan Estonııa basshylyǵy Qazaqstan men Eýropa seriktestigin ilgeriletýge úles qosady dep oılaımyz, – dedi Memleket basshysy.
Sońynda Nursultan Nazarbaev elshilerdi Qazaqstandaǵy jaýapty dıplomatııalyq qyzmetteriniń bastalýymen taǵy da quttyqtap, jumystaryna tabys tiledi.
