Buǵan eshkim daý aıta qoımas dep oılaımyz. Sodan da bolar, Elbasy «Bolashaqqa baǵdar: rýhanı jańǵyrý» maqalasynda keleshekte ulttyń tabysty bolýy onyń tabıǵı baılyǵymen emes, adamdarynyń básekelik qabiletimen aıqyndalatynyn atap ótip, «Sondyqtan árbir qazaqstandyq, sol arqyly tutas ult HHI ǵasyrǵa laıyqty qasıetterge ıe bolýy kerek. Mysaly, kompıýterlik saýattylyq, shet tilderin bilý, mádenı ashyqtyq sııaqty faktorlar árkimniń alǵa basýyna sózsiz qajetti alǵysharttardyń sanatynda. Sol sebepti «Sıfrly Qazaqstan», «Úsh tilde bilim berý», «Mádenı jáne konfessııaaralyq kelisim» sııaqty baǵdarlamalar ultymyzdy, ıaǵnı barsha qazaqstandyqtardy HHI ǵasyrdyń talaptaryna daıarlaýdyń qamy», dep jazǵan edi. Memleket basshysy meńzegen mańyzdy baǵyttar boıynsha Shyǵys Qazaqstanda da júıeli jumystar qolǵa alynýda. Bul rette bilim ordalaryna artylar jaýapkershilik júgi salmaqty ekeni aıtpasa da túsinikti shyǵar. Degenmen de «Sıfrly Qazaqstan», «Úsh tilde bilim berý» sekildi aýqymdy baǵdarlamalarǵa alǵash ún qosyp, oqýshylardy erte bastan kompıýterdi jete meńgerýge baýlyp jatqan mektepter de bar. Máselen, ashylǵanyna 3 jyl ǵana bolǵan О́skemendegi № 46 qazaq orta mektebi ınformatıka pánin ádettegideı 5-synyptan emes, bıylǵy oqý jylynan 4-synyptan bastap oqytýdy jón kóripti. Aptasyna bir saǵat júrgiziletin qosymsha sabaq «aqparattyq tehnologııalar negizderimen tanysý» dep atalady. Osy maqsatta 20 noýtbýk aldyq. Qazirgideı aqparat zamanynda oqýshylarymyz kompıýterdi balǵyn shaǵynan bas-tap meńgerse, utylmaıtynymyz anyq, deıdi mektep dırektory Gúlfarıda Aýǵanbaeva. Taǵy bir erekshe atap óter dúnıe, bilim ordasy bıyl mektep baǵdarlamasyna alǵash ret «Men – ınjenermin» degen qosymsha sabaq engizgen. Bes saǵattan turatyn sabaq 5-synyp oqýshylaryna ǵana júrgiziledi. «Jaqsyny kórmekke» degendeı, jańa pánniń qalaı júrgiziletinine biz de qyzyǵýshylyq tanytyp, bir sabaǵyna arnaıy qatysyp kórdik. Qyryq bes mınýt muǵdarynda ańǵarǵanymyz, bul qosymsha sabaq oqýshylardy ózdiginen jazý-syzýǵa, kompıýter kómegimen ártúrli dúnıelerdiń eskızin jasaýǵa úıretedi eken. Ár oqýshynyń aldynda bir-bir kompıýter. Oqýshylardyń bul pánge degen qyzyǵýshylyǵyn bir saǵatqa jýyq ýaqyt boıy bas kótermeı tapsyrma oryndaýlarynan-aq baıqaǵandaı boldyq. «Qosymsha sabaqty júrgizip jatqanymyzǵa kóp ýaqyt bolǵan joq. Biraq shákirtterimizdiń yqylasyn, ynta-jigerin ózińiz de ańǵarǵan bolarsyz. Búgin oqýshylar «3D Builder» degen baǵdarlamamen jumys istep, jazyq deneden úsh ólshemdi deneni qurastyrdy. Olarǵa qazir geometrııalyq fıgýralardy kompıýterlik úlgide jasaýdy úıretip jatyrmyn. Bul pán oqýshylardyń jyldam sheshim qabyldaýyna, synı turǵydan oılaýyna úlken septigin tıgizedi», deıdi ınformatıka pániniń muǵalimi Shynar Babataeva. Sonymen qatar ol aldaǵy ýaqytta oqýshylardyń kompıýter arqyly jasaǵan jumystaryn qaladaǵy A.Pýshkın atyndaǵy oblystyq kitaphanaǵy 3D prınterden shyǵarýdy josparlap otyrǵandyǵyn da jetkizdi. Sabaq sońynda eki-úsh oqýshyny sózge tartqanymyzda «Sabaq óte qyzyqty. Kompıýtermen jumys isteýdi úırenemiz, ózimiz qalaǵan dúnıeni jasaımyz», dedi barlyǵy biraýyzdan.
Myńnan astam oqýshysy bar mektepte aǵylshyn tilin úırenýge de erekshe den qoıylyp jatyr eken. Qazirgi ýaqytta bilim ordasynyń hımııa, fızıka, bıologııa jáne ınformatıka pánderiniń 6 muǵalimi álemde saltanat qurǵan tildi meńgerý úshin ártúrli kýrstarǵa qatysyp, tanym kókjıekterin keńeıtýde. Budan bólek mekteptiń qazaq, orys jáne aǵylshyn tili pánderiniń muǵalimderi oblysta qolǵa alynǵan arnaıy baǵdarlama aıasynda biliktilikterin arttyrdy. Bir aıta keterligi, óńirdiń aǵylshyn tili ustazdaryna Londonnan kelgen til jetkizýshiler, ıaǵnı aǵylshyndardyń ózderi sabaq bergen bolatyn. «О́z ishimizde qaınap júre bergen jaramaıdy eken. Biz qansha degenmen qalada turamyz ǵoı. Kóp dúnıe qoljetimdi. Shetelden arnaıy shaqyrylǵan mamandardan dáris alý ásirese shalǵaı aýyldardan kelgen áriptesterimizge paıdaly boldy dep oılaımyn. Baıqaǵanym, olar aýyz eki sóıleýge kóp mán beredi. Osyndaı tájirıbe almasýlar biz úshin asa qajet», deıdi №46 mekteptiń 25 jyldyq eńbek ótili bar ustazy, aǵylshyn tili pániniń muǵalimi Aıgúl Mýsınova.
Azamat QASYM,
«Egemen Qazaqstan»
О́SKEMEN
Sýretti túsirgen avtor
