Mońǵolııalyq qusbegiler búrkitti asyraýdyń ońaı emestigin jáne sol sebepti ony kez kelgen úı asyraı bermeıtinin aıtady. Qyran qusty asyraý úshin kúnine kem degende jarty keli et qajet.
Mońǵolııada búginde júzdegen búrkitshi bar. Alaıda, sanaýlysy ǵana qyran qusty tek ańshylyq maqsatta paıdalanady.
«Búrkittiń kózi ótkir ekeni belgili. Ol tipti, eki shaqyrym qashyqtyqtaǵy qoıandy dy anyq kóredi. Eresek qusty qolǵa úıretý múmkin emes. Sondyqtan ony balapan kúninde uıadan alyp asyraıdy. Al ańshylyqqa tek urǵashysyn paıdalanady. Sebebi, erkek qus álsizdeý keledi.
Qolǵa úıretý úshin birneshe jyl ýaqyt ketedi. Osy ýaqyt aralyǵynda qus ósip, ıesine tolyqtaı úırenedi. Al ıesi qyranǵa qandaı kólemde tamaq berýi kerektigin jaqsy bilýi tıis. Sebebi, qus toq bolsa, ań aýlaýǵa qyzyǵýshylyǵy bolmaıdy. Al qarny ash jaǵdaıda ustaǵan jemtigin ıesine bermeýi múmkin.
Iesi ony attyń júrisine, tuıaǵynyń dúrsiline jáne shaqyrǵan kezde keri qaıtýyna úıretýi tıis. Uzaq daıyndyqtan keıin jyrtqysh qus ań aýlaýǵa daıyn bolady. Ári osy ýaqyt aralyǵynda qus pen búrkitshiniń arasynda erekshe bir baılanys paıda bolady. Tipti, ıesinen uzap eshqaıda ushpaıtyn bolady.
Kózindegi tomaǵa oǵan eshqaıda alańdamaýyn, aıaqbaýy onyń ýaqytynan buryn ushyp shyqpaýyn qamtamasyz etedi. Ańshy búrkit jemtigine aldymen tyrnaǵymen jabysyp, júregin shoqyp tastaıdy. Al júgirip jetken ıesi ony sıpap, astyndaǵy ańdy alady. Bul tusta ıesi oǵan mindetti túrde bir túıir et berýi tıis», – dep jazady BBS.
Mońǵolııadaǵy qazaqtar jylda ótetin kúzgi festıvalge jaqsylap daıyndalady. Konkýrsqa Mońǵolııanyń túkpir-túkpirinen ondaǵan qazaqtar jınalady. Bul joly da festıval keń kólemde, júzdegen týrısterdiń kóz aldynda ótti.
Jarystyń alǵashqy kezeńinde ıesi ushyp shyqqan búrkitin shaqyrýy tıis. Aldymen qyran qusty bıik jotanyń basynan ushyrady. Al tómende turǵan ańshy ony aıqaılap shaqyrady. Búrkit osy tusta ıesiniń qolyna baryp qonýy qajet. Mine, osy tusta nashar daıyndalǵan qus múldem basqa jaqqa qaraı ushyp ketip, ıesin uıatqa qaldyrady. Bul synnan súringennen keıin tıisinshe kelesi aınalymǵa óte almaıdy.
Kelesi kezeńde qyrannyń ań aýlaý sheberligi synalady. Iаǵnı, búrkit atqa baılanǵan qoıandy ustaýy kerek.
Mundaı festıval atadan balaǵa mıras bolyp kele jatqan ańshylyq dástúrdiń úzilip qalmaýyna septigin tıgizedi. Al osy baıqaýdy óz kózimen kórýge kelgen sheteldikterdiń arqasynda memlekettiń de týrıstik áleýeti artady.
Daıyndaǵan Aıan ÁBDÝÁLI, «Egemen Qazaqstan»
