Qytaı basshysy bir sətke de alǵa qoıǵan uly maqsattan, ıaǵnı Qytaıǵa ǵana tən sosıalıstik damý jolynan taımaı, orta dəýletti qoǵamdy qalyptastyrýǵa kúsh salý jəne esh kúmənsiz juńǵo halqynyń armany bolǵan qytaı ultynyń jańǵyrýy týraly aıtyp ótti.
– Osy maqsatqa jetý jolynda ərbir kommýnıst ózgeristerden boı tartpaı, ınnovasııamen aınalysyp, bir orynda turyp, kónerip qalýdan saqtanyp, túpki maqsatqa jetýge kúsh salýy tıis. Qazirgi ýaqytta Qytaı ekonomıkasy əlemdegi aldyńǵy oryndardy ustap, jetistiginen aınymaı keledi. Ishki jalpy ónim 54 trln qytaı ıýaninen 80 trln ıýange kóterilip, əlem ekonomıkasyna qosqan juńǵo jurtynyń úlesi 30 paıyzǵa artty. Buǵan deıingi quryltaımen arada elde 1500-ge tarta reformalyq shara júzege asyryldy. Kedeılikpen kúrestiń qarqyndy júrgizilýiniń arqasynda 60 mln adam onyń qursaýynan shyqty. Kedeılik kórsetkishi 10,2 paıyzdan 4 paıyzǵa tómendedi. Biz úshin adamdar boıynda qanaǵattanǵandyq sezimi ornaýy mańyzdy, – dedi baıandamasynda Sı Szınpın.
Qytaı basshysynyń aıtýynsha, uly armanǵa jetý úshin uly kúres kerek. Juńǵo jurtyn óz ıdeıalaryna ertken kommýnıstik partııa búgingi zamannyń qaterlerine, iri təýekelderine qarsy turyp qaıshylyqtardy jeńe bilýi tıis. Partııa alǵa qoıǵan mindetterdiń kóp jyldarǵa baǵyttalǵanyn, onyń qıyndyǵyn, kóp ter tógýdi qajettigin bilip uly maqsatqa, uly armanǵa jetýde uly baǵdarlama qajettigin biledi. Sondyqtan partııa qurylysynyń jańa baǵdarlamasy usynylyp otyr, dedi ol.
Anar TО́LEÝHANQYZY,
«Egemen Qazaqstan»,
Beıjiń, QHR
