Qarjy mınıstrliginiń aqparatyna sáıkes 2018–2020 jyldarǵa arnalǵan respýblıkalyq bıýdjet jobasy bıyl tamyz aıynda maquldanǵan respýblıkanyń 2018–2022 jylǵa arnalǵan áleýmettik-ekonomıkalyq damý boljamynyń negizinde qalyptastyrylǵan.
Respýblıkalyq bıýdjettiń josparly kezeńge arnalǵan negizgi parametrleri 2018 jyly — 8578,3 mlrd teńge (JIО́-ge 15,3%), 2019 jyly — 9190,2 mlrd teńge (15,1%), 2020 jyly — 9566,2 mlrd teńge (14,6%) túsimderinen turady. 2018 jyly shyǵyndar 9217,9 mlrd teńge (JIО́-ge 16,5%), 2019 jyly — 9798,2 mlrd teńge (16,1%), 2020 jyly — 10 219,7 mlrd teńge (15,6%) kóleminde josparlanǵan.
Respýblıkalyq bıýdjet shyǵystarynyń jalpy kóleminde eń úlken úles áleýmettik salaǵa tıesili, ol 2018 jyly 44,6%-dan 2020 jyly 47,4%-ǵa deıin artady. Aqshalaı máninde bul 13 401 mlrd teńgeni quraıdy, sondaı-aq, 2018 jyly — 4108,6 mlrd teńge.
Atalǵan shyǵystar blogynyń negizgi kólemi áleýmettik qamsyzdandyrý men el azamattaryna áleýmettik kómek kórsetýge tán. Josparly kezeńde bul baǵytqa 8707,5 mlrd teńge qarastyrylǵan. Olardyń ishinde aǵymdaǵy jyly 473 mlrd teńgege nemese 22,1%-ǵa ósimmen 2018 jyly 2612,9 mlrd teńge qarastyrylǵan.
Sonymen qatar atalǵan shyǵystardyń negizgi úlesin áleýmettik tólemder quraıdy. Úsh jyldyq kezeńde olardy qarjylandyrýǵa 8508,7 mlrd teńge, onyń ishinde 2018 jyly — 2547,9 mlrd teńge bólinedi.
Bıylǵy jylmen salystyrǵanda 2018 jyly zeınetaqy tólemderiniń artýy birqatar sebepter men bastamalarǵa baılanysty. Bul — alýshylar sanynyń ulǵaıýy, zeınetaqy mólsherlerin jyl saıynǵy ındeksteý, zeınetaqy júıesine qatysý ótiline qaraı bazalyq zeınetaqy tólemderin taǵaıyndaý tártibiniń ózgerýi, sondaı-aq, eń tómengi kúnkóris deńgeıi qurylymynyń ózgerýi.
