«Táýelsizdik alǵan kúnnen bastap prezıdent Nursultan Nazarbaev Qazaqstannnyń bolashaǵy úshin bilim salasyna basa nazar aýdaryp keledi. Táýelsizdik jyldary ishinde myńnan asa mektep salyndy. Munyń bári de óskeleń urpaqtyń halyqaralyq standarttarǵa saı bilim alyp, Qazaqstannyń álemniń 30 damyǵan elder qataryna tezirek enýine óz úlesterin qosýy úshin jasalýda. Memleket basshysynyń tapsyrmasyna sáıkes, osy jyly Aqtóbe oblysynda 25 mekteptiń qurylysy júrip jatyr, onyń 11-i endigi paıdalanýǵa berilip te qoıǵan. Jyl sońyna deıin taǵy tórt mektep ashylady,» dep atap ótti oblys ákimi óziniń quttyqtaý sózinde.
Jańa mektep zamanaýı kompıýterlerlik jáne keńse tehnıkasymen jabdyqtalǵan, oqýshylardyń bilim alyp, fızıkalyq damýy úshin barlyq tıisti qolaıly jaǵdaı bar. Úsh qabatty ǵımaratta sporttyq jáne akt zaldary, kitaphana, jańa modıfıkasııaly oqý kabınetteri, medıateka, qysqy baq, demalys oryndary men taǵy basqalar bar. Qurylystyń jalpy quny - 760 mln. teńgeden asady.
«Búgin qobdalyqtardyń júrekteri qýanyshqa toly. О́ıtkeni, bizdiń balalarymyz endi osyndaı ádemi, zamanaýı mektepte oqıtyn bolady. Men munda olardyń laıyqty bilim men rýhanı tárbıe alatynyna senimdimin. Bul oqıǵa oqýshylar men olardyń ata-analarynyń júrekterinde máńgige qalady. Bul qýanysh, eń aldymen, bizdiń elimizdiń Táýelsizdiginiń, Elbasy Nursultan Nazarbaevtyń dana saıasatynyń arqasynda múmkin boldy. Men de qobdalyqtardyń atynan Berdibek Máshbekulyna Prezıdent tapsyrmasyn óńirimizde minsiz oryndaǵany úshin alǵysymdy bildirgim keledi,» dedi ata-analar men oqýshylardyń jáne jurtshylyq atynan sóz sóılegen Zardahan Ábigeı.
Jańa oqý ornynyń ashylýymen úsh aýysymmen oqý máselesi sheshildi.
«Osy kúnge deıin Qobda aýylynyń barlyq 314 oqýshysy úsh aýysymda oqyp keldi. Endi ondaı másele bolmaıdy. Ǵımarat – zamanaýı, ádemi. Munda balalarǵa jaǵymdy ári qyzyqty bolyp, bilim berý sapasy jaqsarady dep senemin,» dedi mektep dırektorynyń orynbasary Ásııa Nurbaeva.
Qobda aýdanyna jumys sapary barysynda óńir basshysy jańa «Otan Ana» jáne «Máńgilik el» baqtarynda boldy. «Otan ana» baǵynyń birneshe taqyryptyq aımaqtary bar, olardyń biri Keńes Odaǵynyń batyry, Qobda aýdanynyń týmasy Álııa Moldaǵulovaǵa arnalǵan. Osy jylǵy kúzde ataqty mergen qyzǵa bıiktigi tórt metr bolatyn eskertkish ornatylmaq.
«Máńgilik el» baǵy da taqyryptyq aımaqtarǵa bólingen. Mundaǵy tasta Uly Otan soǵysynan oralmaǵan 3,5 myń qobdalyqtyń jáne osy ólkeniń saıası qýǵyn-súrginniń qurbany bolǵan 300 týmasynyń esimi jazylǵan. Baqtyń aýmaǵy 13,8 myń sharshy metr, al onyń mańyzdy ereksheligi – alańda ornatylǵan 21 metrlik tý tuǵyry bolyp tabylady.
Temir QUSAIYN,
«Egemen Qazaqstan»
AQTО́BE
