Sapar Isaqov bastaǵan bir top qyrǵyz delegasııasy keshe Astanaǵa keshtetip jetti. Úkimet basshysy, onyń orynbasarlarynan bastap búkil mınıstrleri bar qyrǵyz delegasııasy Qazaqstan Úkimeti basshysymen kezdesý týraly bastamany ózderi usynǵan eken. Oǵan Qazaqstan tarapy kelisim bergen sátte birden Astanaǵa ushyp kelgen.
Delegasııa quramynda birinshi vıse-premer-mınıstr Tolqynbek Abdyǵulov, syrtqy ister mınıstri Erlan Abdyldaev, qarjy mınıstri Adylbek Qasymalıev, ekonomıka mınıstri Artem Novıkov, memlekettik keden qyzmetiniń tóraǵasy Azamat Sýlaımanov, memlekettik salyq qyzmetiniń tóraǵasy Oktıabr Abdykaımov, memlekettik ekonomıkalyq qylmystarǵa qarsy kúres qyzmetiniń tóraǵasy Zamırbek Osmonov, memlekettik kóshi-qon qyzmetiniń tóraǵasy Medetbek Aıdaralıev, memlekettik keden qyzmeti tóraǵasynyń orynbasary Qurmanbek Isakov jáne basqalary bar.
Eki el Úkimet basshylarynyń kezdesýi aldymen shaǵyn quramda jabyq esik jaǵdaıynda ótti. Odan soń eki eldiń mınıstrlikteri men vedomstvolary basshylarynyń qatysýymen keńeıtilgen quramda kelissózder júrgizildi. Onyń barysynda shekaralyq, kóliktik, fıtosanıtarııalyq jáne veterınarııalyq baqylaý, EAEO jáne DSU erjeleri men normalaryn eskere otyryp, kedendik jáne salyqtyq ákimshilendirý máseleleri qarastyryldy.
«Qazaqstan Prezıdenti N.Nazarbaevtyń birneshe ret atap ótkenindeı, baýyrlas eki eldiń qarym-qatynasy barlyq jaǵynan jaqsy ári óńirdegi ózara tıimdi yntymaqtastyqtyń úlgisi bolýy kerek», dedi B.Saǵyntaev kelissózder barysynda.
О́z kezeginde S.Isaqov Qyrǵyzstannan úlken delegasııa kelgenine toqtaldy. «Men Qyrǵyzstannyń Premer-mınıstri retinde syndarly jumysqa beıildimin», – dep atap ótti ol.
Kelissózderdiń qorytyndysy boıynsha taraptar 19 qazandaǵy 00.00 saǵattan bastap qazaq-qyrǵyz shekarasynan qol júgi bar jeke tulǵalardyń, jolaýshy tasymaldaıtyn turaqty avtobýstardyń, jeńil avtokólikterdiń, bos júk kólik quraldarynyń basymdyqty tártippen ótýin qamtamasyz etýge ýaǵdalasty.
Sonymen qatar, ekijaqty ekonomıkalyq qarym-qatynastardyń ózekti máseleleri boıynsha birlesken «Jol kartasyn» ázirleý úshin Qazaqstan men Qyrǵyzstan Premer-mınıstrleriniń birinshi orynbasarlary tóraǵalyq etetin jumys tobyn qurý týraly sheshim qabyldandy.
Kelissózder aıaqtalǵannan keıin onyń qorytyndysy jóninde Premer-mınıstr Baqytjan Saǵyntaev málimdeme jasap, qyrǵyz elinen úlken delegasııa kelgenin, bul sapar birer kún buryn osy taraptyń bastamasymen bolǵan telefon arqyly sóılesýdiń nátıjesinde júzege asqanyna toqtaldy.
Úkimet basshysynyń atap ótkenindeı, taraptar keden jáne salyqtyq ákimshilendirýge qatysty túıtkildi máselelerdi talqylady. Mysaly, bizdiń keden organdary qyrǵyz tarapynyń Qytaıdan ımporttaıtyn taýarlaryn Qazaqstan aýmaǵy arqyly alyp ótkende tolyq jarııalamaý derekterin anyqtaǵan. Sonyń saldarynan bizdiń el tikeleı zııan shegip otyr. Kelissózderdiń nátıjesinde qyrǵyz jaǵy kún tártibine qoıylǵan osyndaı máselelermen kelisti jáne Premer-mınıstr S.Isaqov Qyrǵyzstan jaǵynyń óz mindettemelerin oryndaýyna, sondaı-aq Eýrazııalyq ekonomıkalyq odaq aıasyndaǵy ekonomıkalyq múddelerdiń saqtalýyna qatysty máselelerdiń oń sheshiletindigine kepildik berdi.
Dınara BITIK,
«Egemen Qazaqstan»
