Qobyzshy Aqerke Tájibaeva bul kúnde sanasań qos qolyńnyń saýsaǵy jetpeıtin eń iri baıqaýlardyń bas júldesin jeńip aldy. Kıeli ónerdiń bel balasy tórtkúl dúnıeniń ár túkpirinde Qazaqstan degen eldiń atynan óner kórsetti. Talanttarǵa kende bolyp kórmegen myna dalany – qazaq arýlarynyń daryny men dıdaryn kúlli álemge tanystyrýmen keledi. Álemniń ár túkpirinde, eldiń ishinde Aqerke óner kórsetken konsertterdiń tizimin sholyp shyǵýdyń ózine tózim kerek. Al bul sahna adamy úshin bitpeıtin bir daıyndyq, uzaq-uzaq saparlar, talǵamy túrli, ulty san alýan jańa tyńdarmandar.
Endeshe sózimiz qurǵaq bolmasyn, ol XXV respýblıkalyq jas oryndaýshylar konkýrsy, Qurmanǵazy atyndaǵy VII halyq aspaptarynda oryndaýshylar konkýrsy, Táttimbet Qazanǵapuly atyndaǵy II respýblıkalyq halyq aspaptarynda oryndaýshylar konkýrsy, respýblıkalyq «Asyl mura» dástúrli kúı oryndaýshylar baıqaýy, Yqylas atyndaǵy I respýblıkalyq qobyzshylar konkýrstarynyń laýreaty, halyqaralyq «Dede Korkut» festıvali, TMD memleketteriniń arasyndaǵy jastar arasyndaǵy II «Delfıı oıyndary», «Altin Safran», «Uluslararasi Sivas asiklar», «14. Uluslararasi, Altin saz odulu Karacaoglan asiklar» festıvaldarynyń jeńimpazy.
Arý qobyzshy Vengrııa, Moldova, Germanııa, Aýstrııa, Fransııa, Úndistan, Lıtva, Qytaı, Ońtústik Koreıa, Tájikstan, Reseı, Qyrǵyzstan, AQSh, Japonııa, Iordanııa hashımıttik koroldiginde, Arab ámirliginde, Ispanııa koroldiginde, Italııa, Shveısarııa, Meksıka jáne Túrkııa memleketterinde zal toly halyqtyń rııasyz qoshemetine bólendi.
Qurmanǵazy atyndaǵy Qazaq Ulttyq konservatorııasyn qyzyl dıplommen bitirgen ónertaný magıstri osy oqý ordasynda birneshe jyl dáris berdi. Qazir Astanadaǵy «Qazaqkonsert» memlekettik konserttik uıymynyń solısi. Sonymen qatar respýblıkalyq jáne qalalyq kólemdegi uıymdastyrylatyn is-sharalardan qalmaıdy.
Sonaý 1992 jyly «Ánshi balapan» baıqaýynyń, keleri jyly «Ýtrennıaıa zvezda» konkýrsynyń birinshi ornyn jeńip alǵan Aqerke birneshe jyl «Habar» telearnasynda «Aqerke» baǵdarlamasyn júrgizgenin umytpaıtyndar bar. Bertin kele «Balapan» telearnasynda «Án salaıyq» baǵdarlamasyn júrgizdi.
Aqerke qazaq radıosy men kóptegen telearnalardan da óz ónerin halyqqa tanytyp keledi. 2008 jyly «Kóktem» atty aspapty úntaspasy jaryqqa shyqty. «Babalardan qalǵan mura – qyl qobyz» atty jobasymen Qazaqstan Respýblıkasy Tuńǵysh Prezıdenti Qorynyń grantyn ıelenip, 2009 jyly qobyzshy Jappas Qalambaevtyń 100 jyldyq mereıtoıyna arnalǵan «Máńgilik qobyz saryny» atty shyǵarmashylyq keshin ótkizdi. 2011 jyly Túrkistan qalasynda jeke konsertin berdi. 2013 jyly Almatyda «Tógilip saryn qobyzdan...» jeke keshin, 2015 jyly «Aralap qobyz úni keń álemdi...» atty jeke konsertin ótkizdi.
Qysqasy, bárin aıt ta birin aıt, óner adamynyń ómirde de joly bolǵanyn aıt. О́ner qýǵan qobyzshy ótken jyly teńin taýyp, Aqtóbe óńirine kelin bolyp tústi. Aqerkeniń uzatylý toıynda óner kórsetpegen ánshi joq. Bılemegen adam kemde-kem.
Eń qyzyǵy, kelin bolyp aq oramal salyp, qaıyn jurtyna ıile barǵan Aqerke Aqtóbede ótken úlken toıynda óner kórsetti. Jańa túsip turǵan kelin júz jerden talantty, tanymal bolsa da qobyz tartamyn demegeni anyq. Alaıda has ónerdiń qudiretin baǵalaıtyn kópshilik kelinderiniń ónerli ekenin biledi ǵoı.
Bul jerde qobyzshynyń jigittiń talaı sultanynyń ishinen tańdaǵan qosaǵy tosynsyı jasaǵan. Áıtpese «ssenarııde» kelin qobyz tartady degen bolmaǵan ǵoı. Toı tarqaýǵa jaqyndaǵanda kúıeý jigit jınalǵan kóppen qıylyp, Aqerkeden óner kórsetýdi suraıdy.
– Qobyzym úıde qaldy. Qalaı óner kórsetemin? – dep qysylǵan kelinge Esenjol shymyldyqtyń artynda jasyrýly turǵan, ózine deıin shırek ǵasyr syńary bolǵan qobyzyn kórsetedi. Sóıtse ol toıǵa shyǵarda Aqerkeden tyǵyp, qobyzyn alǵyzǵan eken.
Osylaısha jańa túsken kelin qobyzdyń máńgilik muńdy sarynymen eldi uıytyp, jas-kárini tebirentip, bir ǵajap konsertke keltirgendeı bolady. Kelinniń ónerinen habarsyz qaıynjurty toıda aıran-asyr bolyp, tánti bolǵanyn, tańdanǵandaryn da jasyrmaıdy. Al enesi «qaıda júrseń de qazaqtyń ónerin tanyta ber, asqaqtata ber! О́neriń órleı bersin» dep dúıim jurtyń aldynda batasyn beredi.
– Turmysqa shyqqan soń da joldasym ónerime qarsy bolmaı, qobyzymmen ári qaraı el aralap, dástúrli mýzykany nasıxattaýyma ruqsatyn berdi. Esenjol – «Bolashaq» stıpedııasyna iligip, Ulybrıtanııada joǵary bilim alǵan zańger. Sonymen toıdan keıin de óz elimizdegi konsertterden de qalmaı, Ońtústik Koreıa, Meksıka, Ispanııa men Italııaǵa sapar shektim. Meksıkada bolǵan alǵashqy dástúrli mýzykant retinde elimizdiń Táýelsizdik kúnine arnalǵan birneshe konsertte, Seýlde ótken xalyqaralyq «Turkic culture» (Túrki mádenıeti) festıvalinde Qazaqstan atynan óner kórsettim. Bıyl naýryz aıynda Elbasynyń Áıelder merekesine oraı uıymdastyrylǵan qabyldaýynda bolyp, arnaıy syımen marapattaldym. EKSPO xalyqaralyq kórmesiniń aıasynda ótken birneshe konsertke qatystym, – deıdi endi qobyz arqalaǵan kelin.
Quralaı Shyńǵysqyzy
ALMATY
