Osylaısha qalalyq perınataldyq ortalyqta 2015 jyldyń 21 shildesinde tórtinshi ret úshem dúnıege kelse, 5 tamyzda tórtem dúnıege kelgen bolatyn. Oǵan deıingi tórtemder Almatyda 2010 jyly týǵan-dy.
Til-kózimiz tasqa! Qazir bul balaqaılardyń barlyǵy da aman-esen, qylyqtary táp-tátti bolyp ósip keledi.
Tabıǵı jolmen tórtem taýyp, otbasynyń tóbesin kókke jetkizgen Baıan Abdýllınanyń buǵan deıin de úsh uly bar bolatyn. Sóıtip eki birdeı dıplomy bar Baıan bir kúnde «Altyn alqaly» ana bolyp shyǵa kelgen-di.
Jeti balany jetkizýge kúıeýi kásipker Qanattyń shamasy jetetinine shúkirshilik aıtqan qursaǵy qutty kelinshektiń aıaǵy aýyr kezinde qınalǵany da ras. Biraq búginde onyń barlyǵy kórgen tústeı.
Egiz balany da ekiniń biri taýyp jatqan joq, bastapqyda Baıanǵa dárigerler qursaǵyndaǵy balanyń úshem ekenin aıtqanda, azdap eseńgirep qalsa, Qalqamandaǵy aýrýhanaǵa túsik tastap qoıý qaýpi týyndap, qaıta qaralǵanda úshem emes, ishtegi balalar tórtem bolyp shyqqanda, tipti tań qalady. Sol sharanalardyń barlyǵy da aman-esen shyryldap dúnıege keldi.
Osy perınataldyq ortalyqta 25 jastaǵy Tolǵanaı Slamhan atty súıkimdi kelinshek Injý, Aqnur jáne Ińkár atty sábılerdi aman-esen bosandy. Sol kezde jumaqqa baratyn úsh qyzdyń áke-sheshesi Jarkenttiń týmalary ekendigi, qalada jaldamaly páterde turatyndyǵy aıtylǵan. Úshemnen bólek bul juptyń eki jasar Aısha esimdi qyzdary bolatyn.
Qýanyshy uzaǵynan bolǵyr balalardyń ákesi Baýyrjan Satybaldıev qurylysshy. Qalalyq ákimdiktiń ókilderi bir kúnde kóp balaly bolyp shyǵa kelgen jupqa tezirek baspanaly bolýlaryna yqpal etetindikterin málimdegeni de este.
Sol kezde dárigerler bul balalardyń barlyǵy da shynydan shyqpaǵanyn, tabıǵı jolmen jaryq dúnıe esigin ashqanyn aıtqan edi.
Búgingi tańda táýelsiz Qazaqstan tarıhynda nebári bes otbasynda ǵana tórtem bar desedi. Solardyń ishinde 2015 jyldyń 5 tamyzynda ómirge kelgen bir qursaqtaǵy egizder qazaq tarıhynda qalady. Sebebi, olar – eshqandaı dárigerdiń aralasýynsyz, tabıǵı jolmen dúnıege kelgen alǵashqy tórtemder bolǵanyn joǵaryda atap óttik.
Keshe ǵana dúnıe esigin bar bolǵany bir keliniń ar jaq-berjaǵyndaǵy salmaqpen ashqan shaqalaqtar búgin balabaqsha tabaldyryǵyn attapty. Bul otbasy sońǵy kezde ǵana sábıleriniń sýretterin elge kórsete bastady.
«Tórt birdeı sábıdi ómirge ákelip, ósirý ońaı emes. Sharshaısyń, biraq tórtem týǵanyma eshqashan ókingen emespin», depti jeti balany ómirge ákelgen batyr ana Baıan Abdýllına «Kúndelikti ómir» portalyna bergen suhbatynda.
Qazaq tarıhyndaǵy eń alǵashqy bir qursaqtan shyqqan tórt egiz bolǵandyqtan perzentti bolýdy kópten kóksep júrgen erli-zaıyptylar Erseıitovter otbasyndaǵy sábılerdiń kıimin yrymdap, «juǵysty bolsa eken» dep alady eken.
Aınash ESALI, «Egemen Qazaqstan»
