Ardager tulǵa, óz eliniń patrıoty, bizdiń maqtanysh eter jerlesimiz Násipqalı Ábýǵalıuly Marabaev 2007 jylǵy 19 tamyzda, 70-ke tolar shaǵynda kenetten qaıtys boldy.
Munaıly Atyraýda týyp, kóp balaly otbasynda tárbıelengen, orta mektepti bitire sala Máskeýdiń Gýbkın atyndaǵy munaı ınstıtýtyn támamdaǵan ol qarapaıym burǵyshydan «Mańǵyshlaqmunaı» óndiristik birlestiginiń bas dırektorlyǵyna deıingi eńbek jolynan ótti. Munaıshy-ınjener Marabaev Mańǵystaý munaıynyń bastaýynda turǵan birden-bir qaıratker. Ol sondaı-aq Qazaqstan Respýblıkasyn munaıly derjavalar qataryna qosý jolynda da eren eńbek etti.
Ásirese onyń uıymdastyrýshylyq qabileti, basshylarǵa tán bilimi men biligi, óndiris salasyndaǵy tegeýrindi talanty men tájirıbesi Mańǵystaý oblysyn basqarǵan jyldarynda, oblystyq partııa komıtetiniń hatshysy kezinde, Qazaq KSR Halyqtyq baqylaý komıteti tóraǵasynyń birinshi orynbasary ýaqytynda jarqyraı kórindi. Dál osy kezeńderde ol kórnekti memleket jáne qoǵam qaıratkeri retinde qyrýar sharýalar atqaryp, eldiń erekshe súıispenshiligine bólendi. San-salaly qyzmet atqaryp júrse de, Násipqalı Ábýǵalıuly óziniń túpkilikti kásibi – munaı salasyn bir sát te umytpady jáne munaıshy dos-jarandarymen de baılanysyn úzbedi, ómiriniń sońyna deıin syılasýmen ótti.
Onyń uıymdastyrýshylyq, basshylyq talantynyń barynsha ashylǵan tusy – odaqtyq mańyzy bar «Mańǵystaýmunaı» óndiristik birlestigin basqarǵan jyldary ekenin joǵaryda aıtyp óttik.
Nákeńniń búkil ǵumyry tynymsyz ıgilikti eńbekpen ótkeni belgili, ol osyndaı mereıli ataq-abyroıymen zeınetke shyqty, zeınetker ekenmin dep bir kún de demalǵan joq, naryqtyq ekonomıkanyń alǵashqy jyldarynda kúnkórisi quldyrap ketken ardager-munaıshylardyń aýyr hali oǵan bir sát te maza bermedi. Elimizde 200-ge jýyq munaı-gaz kenishterin ashqan ardager-munaıshylar dál osy kezeńde beıshara kúıge tústi. «Sabaqty ıne sátimen» degendeı, aqyry burynǵy Gýrev oblystyq partııa komıtetiniń birinshi hatshysy, respýblıkanyń kórnekti memleket jáne qoǵam qaıratkeri Asqar Altynbekuly Qulybaevpen, belgili geolog Oral Aqsholaqovpen aqyldasa otyryp, «Munaıshy» qoǵamdyq qoryn qurýǵa bel baılady.
Qordyń basty jarǵylyq maqsaty – osy salanyń ardager-munaıshylaryna shynaıy qamqorlyq jasap, jan-jaqty kómektesý, respýblıkanyń munaı-gaz tarıhyn qalpyna keltirý jáne áıgili munaıshylardyń ataq-dańqyn ulyqtaý, taǵy da basqa qaıyrymdylyq sharalary bolyp belgilendi. Osy bir az ǵana merzim ishinde, atap aıtqanda eki jarym jyldaı ýaqytta, qordyń atqarýshy dırektory bola júrip Marabaev qyrýar sharýa tyndyrdy. Muqtaj munaıshylarǵa qarjylaı qaıyrymdylyq kómek kórsetildi. Qazaqstan munaı ensıklopedııasynyń 2 tomdyǵyn tolyqtyryp qaıta shyǵardy, «Qazaq munaıynyń ardaqtylary» serııasymen áıgili munaıshylardyń ǵumyrnamalyq kitaptary jaryq kórdi, respýblıka memlekettik muraǵatynda munaıshy áýletteriniń ómirderegi tirkeldi, Oral, Jańaózen qalalarynda «Munaıshylar dańqy» alleıasynyń qurylysy bastaldy.
Osylaısha, óziniń qoǵamdyq-qaıyrymdylyq jumystaryn óristetip otyrǵan «Munaıshy» qoǵamdyq qory 2006, 2011 jáne 2012 jyldary qatarynan úsh márte respýblıkalyq konkýrstardyń jeńimpazy atandy, sondaı-aq, respýblıkalyq «Prezıdent jáne halyq» gazetiniń, «Jyl tańdaýy» agenttiginiń altyn belgisi jáne sertıfıkatymen marapattaldy.
Násipqalı Ábýǵalıulynyń baı tájirıbesi, ónerkásip salasyndaǵy biligi men talanty ár kezde de kádege asty, osyny der kezinde sezingen Mańǵystaý oblysynyń ákimi Q.Kósherbaev Marabaev aǵasyn ózine keńesshilikke shaqyrdy, ol sondaı-aq oblystyń ardagerler keńesin de qosa basqaratyn boldy. Nákeńniń osy qyzmette júrip qyrýar ister tyndyrǵanyn Q.Kósherbaev Marabaevty sońǵy saparǵa attandyrar sátte tebirene áńgimeledi. Násipqalıdaı el amanatyn arqalap, at ústinde júrgen azamattyń kenetten dúnıeden ótýi – búkil Qazaqstan halqy úshin aýyr qaza boldy. Elbasy N.Nazarbaev N.Marabaevtyń uzaq jyldar boıy respýblıka ónerkásibine qosqan zor úlesin erekshe atap ótip, otbasyna kóńil aıtý jedelhatyn joldady.
2007 jylǵy qazan aıynda quryltaıshylar men onyń serikteri «Munaıshy» qoǵamdyq qoryna N.Marabaevtyń esimin berýdi bir aýyzdan qoldady. Bul sóz joq, munaı-gaz salasynyń sardaryna aınalǵan, ómiriniń sońǵy kúnderine deıin eli úshin eńbek etken qaıratkerge, aıaýly azamatqa degen shynaıy qurmet edi. Marabaev esimin ulyqtaýda respýblıka jurtshylyǵy da qalys qalmady, Jańaózen qalasyndaǵy úlken dańǵylǵa, Aqtaý qalasyndaǵy mektep-lıseıge Nákeńniń aty berildi.
Iá, Marabaev salyp ketken sara jol eshqashan joǵalmaq emes. О́zi negizin salyp ketken osy jolmen búginde elimizdiń munaıshylary, izbasarlary, shákirtteri sap túzep kele jatyr. Sondaı-aq balalary da áke amanatyn sátti jalǵastyrýda. О́z ǵumyrynda azamattyq paryzy men el aldyndaǵy perzenttik amanatyn adal atqarǵan darhan kóńil, jaısań jan – Násipqalı Ábýǵalıulyn eske alýǵa qasterli tulǵanyń kózin kórgen, qamqorlyǵyn sezingen, sharapatynan úles alǵan dúıim jurttyń jınalýy – joǵarydaǵy sózimizdiń aıqyn dáleli bolmaq.
Násipqalı Ábýǵalıuly kórnekti memleket jáne qoǵam qaıratkeri ǵana emes, otbasynda abyroıly áke, adal jar, syıly otaǵasy bola bildi. Balalaryna degen meıirimdiligi, qamqorlyǵy óz aldyna, zaıyby Láılá Oqanqyzyna degen máńgi ólmes sezimi keıingilerge úlgi bolǵandaı. Qandaı jaǵdaıda bolmasyn, túrli saparlardan kelgende mindetti túrde jaryna gúl syılaý kez kelgen azamattyń qolynan kelmeıtini túsinikti, bul tek Násipqalı Ábýǵalıulynyń ǵana boıyna bitken erekshe minez, qasterli qasıet edi. Nákeń men Láılá Oqanqyzy ekeýi eki ul, eki qyz tárbıelep ósirdi. Olar da áke jolyn ári qaraı jalǵastyryp, tórteýi de Qazaqstan munaı salasynyń basshylaryna, bilikti mamandaryna aınaldy. «Atasyna bitken – batasyna da bitedi» degendeı, endi Marabaevtyń jolymen onyń nemereleri júrip keledi. Endeshe N.Marabaevtyń sara joly bolashaqqa jalǵasýda deýge tolyq negiz bar.
Kórnekti memleket jáne qoǵam qaıratkeri, ǵazız dosymyz Násipqalı Ábýǵalıuly Marabaevtyń týǵanyna 80 jyl tolýyna oraı ardager azamatty eske ala otyryp, onyń otbasyna baıandy baqyt, berekeli tirlik, saý-salamatty ómir tileımiz!
«Munaıshy» QQ quryltaıshylary
A.Qulybaev, O.Aqsholaqov, L.Marabaeva
atqarýshy dırektor
S.Jylqaıdarov
