Egemendiktiń shırek ǵasyrdan astam tarıhynda elimizdiń árbir óńirinen boı kótergen eńseli eskertkishter men monýmentter de eldiktiń eren qalpyn tanytady. Azattyqtyń aq tańyna jetý jolyndaǵy taǵdyrly sátter, sheshýshi kezeńder de ulttyq sáýlet óneri arqyly keń dalamyzda kórinis tapty. Azattyq jolynda aıqasqan alyptar beınesi de eldigimizdiń eren belgisindeı kórinis beredi.
Taraz qalasyndaǵy Tóle bı kóshesiniń boıynda «Gúldengen Qazaqstan» atty monýmentaldy-arhıtektýralyq keshen bar. Munda tarazdyq turǵyndar kún saıyn serýendep, seıil qurady. Atalǵan memorıaldyń janynan El Táýelsizdiginiń 25 jyldyǵyna oraı, «Táýelsizdik monýmenti» boı kóterdi. Monýment qurylysy ótken jyly 30 qarasha kúni tapsyrylǵan bolatyn. Qurylys jumystaryn júrgizgen bas merdiger «Vızart NT» jaýapkershiligi shekteýli seriktestigi.
Monýment bastapqyda trıýmfaldy arka pishinde josparlanǵan. Qazaq halqynyń ejelgi tarıhy túrik saqtarynan bastaý alatynyn eskeretin bolsaq, Shyǵysta arka máńgilik mahabbat pen baqyttyń sımvoly bolyp sanalady. Al monýmenttegi shańyraq memlekettiń túp negizi – otbasynyń beınesi retinde bederlengen. Sondaı-aq segiz buryshty juldyz Qazaqstandy bolashaqqa bastaıtyn jol ispetti jobanyń maǵynasyn asha túsedi. Monýmenttiń bıiktigi 15,8 metr, kólemi 3,5 metr.
Kóne shahardaǵy alyp monýment sýretshi-monýmentshi Amanat Nazarqulov jáne sáýletshiler Asqar Ryspaev, Ilııas Bekejanov, Júsip Sýanbektiń shyǵarmashylyq birlestiginen týǵan. Al nysannyń kompozısııasynda Táýelsiz Qazaqstannyń búgingi tańda qol jetken jetistikteri sýretter arqyly aıshyqtalǵan.
Shahardyń shyraıyn ashyp, kórkine kórik qosyp turǵan osynaý alyp monýment El Táýelsizdigin meılinshe sıpattaıdy. Nysan boıynda kórinis tapqan ulttyq naqysh, ulttyq uǵym-túsinik te eldiń ǵasyrlar boıy saqtalyp kele jatqan dástúr sabaqtastyǵynan habar beredi. Tóle bı kóshesiniń boıyndaǵy eńseli eskertkish asqaqtyǵymen de kóz tartady.
Hamıt ESAMAN,
«Egemen Qazaqstan»
Jambyl oblysy
