Ǵımarattar jaıly aqparattyń (kórsetiletin qyzmetterdiń sapasy, ınfraqurylym, lıftilerdiń jumysy jáne t.b.) qoǵam úshin qoljetimdi bolatyndyǵy týraly Astana qalasy ákiminiń orynbasary Málıka Bekturova jyljymaıtyn múlikke qatysty suraqtar talqylanǵan Ortalyq-Azııa elderiniń forýmynda (CRE) málimdedi.
«Biz osy málimetterge súıene otyryp, ár turǵyn-úı kesheniniń mańyzdylyǵyn túsinemiz. Dálirek aıtqanda, biz ár úıde jaryqtyń, sýdyń qashan jáne qansha ret sóndirilgenin, lıfttiń qaı jerde jáne qashan jumys istemeı qalǵandyǵyn, qansha shaǵym túskenin bilip otyrmyz. Sondaı-aq, biryńǵaı «109 qyzmeti» jumys isteıtinin esten shyǵarmaý kerek. Tek osy jyldyń 9 aıyndaǵy qorytyndylarǵa sáıkes, bizge turǵyn-úı keshenderin, kommersııalyq qordy abattandyrý boıynsha 400 myńnan astam saýal kelip tústi. Osy málimetterdi biz ár nysannyń básekege qabilettiligi men sapasyn naqty túrde baǵalaý úshin naryqqa usynýǵa daıynbyz. Iаǵnı, biz turǵyn-úı kesheniniń nemese bıznes ortalyqtyń premıým nemese bıznes sanaty deńgeıine saı ekendigin anyqtaıtyn bolamyz. Bizge áli de málimetter túsip jatyr», dedi M.Bekturova.
Bul sharalar qalalyq bılik ókilderiniń pikirinshe, azamattarǵa eń aldymen jyljymaıtyn múlikpen baılanysty jaǵdaıdy baǵalaýǵa múmkindik beredi. Oń nátıje retinde jyljymaıtyn múliktiń baǵasyna da áser ete alady. Al bul kórsetiletin qyzmetter sapasynyń birtindep jaqsarýyna ákelýi tıis.
«Biz osy jumystyń qandaı nátıjelerdi beretinin shamalap, keıbir ózderin «premıým» nemese bıznes sanatyna jatqyzǵan keńse nemese ǵımarattar qaıta baǵalanýy múmkin ekendigin túsinemiz. Tıisinshe, bul baǵa turǵysynda qandaı da bir túzetýlerge ákep soqtyrýy múmkin. Alaıda, bizdiń taraptan naryqqa osyndaı aqparat asa qajet», dep túıdi M.Bekturova.
Elorda ǵımarattary reıtıngisiniń úlgisi taıaý arada OpenDataAstana.kz portalynda jarııalanatyn bolady.
