Sol kúnderi Aqjaıyq aýdanyndaǵy Bazarsholan, Bazartóbe aýyldyq okrýgterinde qalyń órt bolyp, eldi mekender jalynǵa orana jazdady. Bókeı ordasy aýdany, Orda aýyldyq okrýgindegi Nurtaı Ahmetovtiń sharýa qojalyǵynan 25 iri qara, 250 orama, 1,5 myń taılanǵan shóp janyp ketti. Ásirese 30 shilde kúni Qaztalov aýdany aýmaǵynda bolǵan alapat órt kezinde Taldyapan aýyldyq okrýgine qarasty Qosoba aýyly turǵyndarynyń 598 bas usaq maly tirideı órtenip ketti. Mal kezeginde júrgen aýyl turǵyny, 1990 jyly týǵan jas jigittiń denesiniń 80 paıyzyn kúıik shalyp, jedel túrde oblystyq aýrýhanaǵa jetkizilgenimen, kóp uzamaı kóz jumdy.
Tosyn qubylystyń tálkegine ushyraǵan aýyldastaryn qaztalovtyq aǵaıyndar barynsha qoldady. Tamyz aıynda aýdandaǵy sharýa qojalyqtary, kásipkerler men aýdan turǵyndary jylý jınap, 360 bas qoı-eshkini qorasy bos qalǵan 16 otbasyna taratyp bergen bolatyn. Qyrkúıek qarsańynda «Mektepke jol» aksııasyn uıymdastyryp, Qosoba aýylyndaǵy mektep oqýshylaryna jalpy quny 400 myń teńge bolatyn kıim-keshek úlestirildi.
Joǵarydaǵy tótenshe jaǵdaıǵa baılanysty jergilikti bılik tarapynan komıssııa qurylyp, shyǵyn eseptelgen edi. 13 otbasynyń órtke ketken 250 bas malynyń ótemi retinde oblys ákimdiginiń rezerv qorynan 5 mıllıon 300 myń teńge qarajat aýdarylyp, ótemaqy 13 qazan kúni mal ıeleriniń qolyna tıdi.
– Bizge kómek qolyn sozǵan barsha janǵa qosobalyqtardyń alǵysy sheksiz. О́rtengen maldyń ornyn toltyryp, maldaı da, aqshalaı da kómek kórsetip jatyr. Rızamyz, bizge jasaǵan jaqsylyq olarǵa da Alladan qaıtsyn dep tileımiz, – deıdi qosobalyq Tastemir Qoıshybaev.
Qazbek QUTTYMURATULY,
«Egemen Qazaqstan»
