19 qazanda Qaraǵandy qalasynda Qazaqstan Respýblıkasy Ortalyq saılaý komıssııasynyń tóraǵasy Berik Imashevtiń qatysýymen osy jyldyń 29 qazanynda taǵaıyndalǵan shyǵyp qalǵandardyń ornyna máslıhat depýtattaryn saılaýdy daıyndaý jáne ótkizý týraly keńes ótti.
Is-sharaǵa Qaraǵandy oblysynyń ákimi E.Qoshanov, barlyq deńgeıdegi saılaý komıssııalarynyń músheleri, ákim apparatynyń qyzmetkerleri, Qaraǵandy oblysynyń ózge de memlekettik organdarynyń qyzmetkerleri men máslıhat hatshylary qatysty.
Keńes barysynda shyǵyp qalǵandardyń ornyna máslıhattar depýtattaryn saılaýyn ótkizýge daıyndyq, saılaýshylar tizimderin qurý boıynsha jumystardy jetildirý, saılaý prosesine qatysýshylardyń elektorattyq mádenıetin arttyrý máseleleri talqylandy.
QR OSK tóraǵasy B. Imashev aýmaqtyq jáne ýchaskelik komıssııalar – bul saılaý júıesiniń negizgi quramdas bóligi, saılaý týraly zańnamanyń oryndalýy, onyń biryńǵaı qoldanylýy osylarmen qamtamasyz etiletinin atap ótti.
Berik Imashev: «Ortalyq saılaý komıssııasy saılaý komıssııalarynyń múshelerin kásibı daıarlaýǵa, qoldanystaǵy saılaý zańnamasynyń barlyq prosesterin qatań saqtaýǵa erekshe nazar aýdarady. Bul úshin OSK aımaqtaǵy bar máselelerdi jan-jaqty talqylaý úshin aýmaqtarda kezdesýler ótkizýdi josparlap otyr» - dedi.
Ortalyq saılaý komıssııasynyń tóraǵasy otyrysqa qatysýshylardy OSK qyzmetiniń elektorattyqaralyq kezeńdegi negizgi baǵyttary: Qazaqstannyń saılaý júıesindegi zańnamalyq negizdi jetildirý, halyqaralyq yntymaqtastyqty damytý, saılaý komıssııalarynyń múshelerin kásibılendirý jáne saılaý prosesterin sıfrlandyrý týraly habardar etti.
Berik Imashev sońǵy jyldary Qazaqstan Respýblıkasynyń Ortalyq saılaý komıssııasy saılaý zańnamasyn baqylaý aıasynda tııanaqty jumys júrgizip otyrǵanyn atap ótti.
Sondaı-aq keńes barysynda, 2017 jylǵy Qaraǵandy oblysynyń saılaý komıssııalarynyń qyzmeti týraly, aımaqtan shyǵyp qalǵandardyń ornyna máslıhattar depýtattarynyń aǵymdaǵy naýqany, pikir almasýlar ótkizildi, saılaýdy uıymdastyrýshylardyń birlesken jumysyn odan ári jetildirý jónindegi mindetter men baǵyttar qarastyryldy.
Ortalyq saılaý komıssııasynyń tóraǵasy saılaý komıssııalarynyń múshelerin turaqty negizde oqytý úshin jergilikti bıýdjetten qarajat bólý qajettigine, sondaı-aq basqa elderdegi saılaýdy baıqaý mıssııalaryn qosa alǵanda, halyqaralyq is-sharalarǵa aımaqtyń ókilderiniń qatysýyn arttyrýǵa nazar aýdardy.
Oblys ákimi keńestiń qorytyndysy boıynsha barlyq usynystardy nazarǵa alatyndyǵyn atap ótti.
