Birinshiliktiń ashylýynda sóz sóılegen oblys ákimi Qumar Aqsaqalov jarystyń qyzyqty ótýine tilektestik bildirdi.
Muz aıdynyna shyqqan petropavldyq «Qyzyljar» men Aqqaıyń aýdanynyń namysyn qorǵaǵan «Sokol» komandalary jeńiske jetý úshin baryn saldy. Bastapqyda teń oıyn órnegi baıqalǵanymen, ýaqyt ótken saıyn qulagerlikter shapshań, jınaqy qımyldap, qarsylastaryn 7:1 esebimen oısyrata utty. Basyna shlem kıip, aıaǵyna konkı taǵyp, qolyna ımek taıaq ustap shyqqan Qumar Irgebaıuly eki shaıba soqty.
«Elbasy ult densaýlyǵy basty baılyq ekenin únemi aıtyp, zor kóńil bólip keledi. Hokkeı kúshtiler, shymyrlar oıyny sanalady. Men onymen mektepte oqyp júrgende shuǵyldandym. Túngi hokkeı lıgasynyń ashylýyna jan-jaqty ázirlendik. Alda tartysqa toly jarystarǵa kýá bolarymyz anyq», dedi matchtan keıin BAQ ókilderine bergen suhbatynda Q. Aqsaqalov.
Sóz arasynda óńirde shaıbaly hokkeıdiń damýyna úlken kóńil bólinip otyrǵanyn aıta ketken jón. «Qulager» hokkeı komandasy eki ret el kýbogynyń ıegeri atandy. Onyń beldi oıynshylary Aleksandr Nýrek, Maksım Volkov, Ilgız Nýrıev qysqy Azııa oıyndarynyń jeńimpazy boldy. Jýyrda jas hokkeıshilerdi jattyqtyratyn arnaıy toptar ashyldy.
Salamatty ómir saltyn nasıhattaýdy ditteıtin túngi hokkeı lıgasynda oınaýǵa 8 komanda ynta bildirip otyr. Jarys Táýelsizdik merekesine deıin jalǵasady.
О́mir ESQALI,
«Egemen Qazaqstan»
Soltústik Qazaqstan oblysy
