Konferensııa barysynda «Jańa gýmanıtarlyq bilim. Qazaq tilindegi 100 jańa oqýlyq» jobasy, sondaı-aq qoǵamdyq sanany jańǵyrtýdyń tujyrymdamalyq problemalary talqylandy.
Konferensııanyń jumysyna 100-den astam adam qatysty. Olar – ǵylymı-sarapshylyq qoǵamdastyqtyń, memlekettik organdardyń, halyqaralyq jáne úkimettik emes uıymdardyń ókilderi.
Konferensııanyń jalpy otyrysynyń moderatory – Ulttyq aýdarma bıýrosynyń atqarýshy dırektory, QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń múshesi, jobanyń Jumys tobynyń jetekshisi Raýan Kenjehanuly «Jańa gýmanıtarlyq bilim. Qazaq tilindegi 100 jańa oqýlyq» jobasynyń iske asyrylý barysy týraly aqparat berip, Bıýronyń jumysynda jobany iske asyrý jónindegi negizgi basymdyqtardy baıandap berdi. Berilgen aqparatqa sáıkes qazirgi tańda 100 oqýlyqtyń on segizi jarııalaýǵa daıyndalyp jatyr. Sonymen qatar, eń tanymal oqýlyqtar taıaý ýaqytta 100kitap.kz. saıtynda elektrondy formatta qoljetimdi bolatyny da aıtyldy. Ǵylymı-sarapshylyq qoǵamdastyq oqýlyqtardy latyn grafıkasyna kóshirýge daıyndyq prosesi týraly da aqparat aldy.
Eýrazııalyq ıntegrasııa ınstıtýtynyń dırektory Ǵanı Nyǵymetov óz sózinde «Rýhanı jańǵyrý» baǵdarlamasynyń asa zor mańyzyn atap ótip, konferensııaǵa qatysýshylardy Instıtýt iske asyryp jatqan jobalarmen de tanystyrdy.
Ǵ. Nyǵymetov óz sóziniń barysynda «Jańǵyrý 3.0: Rýhanı jańǵyrý» degen taqyrypta ótkizilgen dóńgelek ústelder men konferensııalardyń nátıjelerin aıtyp berdi, olardyń barysynda «Rýhanı jańǵyrý» baǵdarlamasyn iske asyrý máseleleri talqylandy. Sonymen birge ol «Rýhanı jańǵyrý» baǵdarlamasy iske asyryla bastaǵannan beri sapaly menedjmentpen súıemeldenip kelgenin, munyń ózi ony qoǵamdaǵy eń bir tanymal baǵdarlamaǵa aınaldyrýǵa múmkindik bergenin atap ótti.
EII dırektorynyń pikirinshe, «úzdik álemdik týyndylardy qazaq tiline aýdarý – bul, árıne, panaseıa emes ári ol adamdy bir sátte-aq básekege qabilettti ete almaıdy, alaıda osy ádebıetpen tanysý bolashaqta tabys kepili bolatyn bilim bagajyn belgili bir túrde sapalyq jaǵynan kúsheıtedi».
Konferensııada QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń múshesi, QR BǴM Ǵylym komıteti Memleket tarıhy ınstıtýtynyń dırektory, tarıh ǵylymdarynyń doktory, professor Búrkitbaı Aıaǵan; Fransııadan kelgen fılosofııa ǵylymdarynyń doktory, professor Remı Hess jáne basqa da ǵalymdar men qoǵam qaıratkerleri spıker boldy, «Fılosofııa boıynsha basty 25 kitap: taldaý men túsindirý» atty kitaptyń avtory gýmanıtarlyq bilimniń róli men mańyzy jóninde aıtyp ótti.
