Ekeýi eki bólek sóz sóılep, bir de bir ret Tramptyń atyn atamady. О́zine deıingi eki prezıdentti synaǵan AQSh-tyń qazirgi Prezıdenti osy jaǵdaıǵa baılanysty ázirge málimdeme jasamady.
Jazylmaǵan zań boıynsha eks-prezıdentter ózderiniń ornyna kelgender týraly kommentarıı berýden bas tartady. Alaıda Obamanyń aıtýynsha onyń dástúrli ún qatýyn toqtatýǵa birneshe sebepter boldy. Olardyń qatarynda Tramptyń «Obamakeır» baǵdarlamasyn toqtatýy, musylmandarǵa elge kirýge shekteý qoıýy men Parıj kelisiminen bas tartýy týraly málimdemeleri bar.
Nıý-Djersı shtatyndaǵy demokratııalyq sharada sóz sóılegen Barak Obama «amerıkalyqtar bóliný men qorqytý saıasatyn qoldamaıtyndyǵyn álemge aıtý kerek» dedi. «Biz osydan júzdegen jyldar buryn bolǵan kózqarasty ustanbaýymyz kerek. Biz HHI ǵasyrdamyz!» dedi eks-prezıdent.
Al Nıý-Iorkte sóz sóılegen Djordj Býsh «bassyzdyq beleń alǵan zamanda ómir súrip jatyrmyz. Bizdi biriktirýge tıis kúsh, bizdi arazdastyryp jatyrǵandaı» dedi.
Donald Tramp bılikke kelgeli BAQ ókilderin tek jaǵymsyz jańalyqtar taratýǵa áýes dep aıtady. Onyń pikirinshe, medıa prezıdenttiń jetistikteri týraly tis jarmaı, jalǵan aqparat taratýda.
