Áýeli Oktıabrdiń 50 jyldyǵy atyndaǵy Jambyl pedagogıkalyq ınstıtýty bolyp qurylǵan oqý orny sol jyldardan beri bilim berý isiniń túrli satylarynan ótti. Stýdentteriniń oqý úderisin, turmys-tirshiligi men bos ýaqytyn tıimdi paıdalaný jaǵdaıynda ınfraqurylymy damyǵan joǵary oqý orny búginde elimizge tanymal ǵylym men bilim ordasy. Instıtýtty ár jyldary Muhtarbaı О́telbaev, Ýálıhan Bıshimbaev, Ábdimanap Bekturǵanov, Mahmetǵalı Sarybekov sııaqty tanymal ǵalymdar men bilikti ustazdar basqaryp, oqý ordasynyń damýyna, qalyptasýyna yqpal etti.
Taraz Memlekettik pedagogıkalyq ınstıtýtynyń jarty ǵasyrlyq mereıtoıy Áýlıeata tórinde keńinen atalyp ótti. Aıtýly sharaǵa elimizge belgili tulǵalar men kórnekti ǵalymdar qatysty. Áýeli ınstıtýt janynan ashylǵan «Balasaǵun» mýzeıiniń ashylý saltanaty boldy. Atalǵan mýzeıdiń lentasyn fızıka-matematıka ǵylymdarynyń doktory, professor Muhtarbaı О́telbaev pen Qazaqstannyń Eńbek Eri Aıagúl Mırazova saltanatty túrde qıyp bolǵan soń, kelgen qonaqtar mýzeı ishindegi jádigerlermen tanysty. Mýzeı kireberisinde jastar úshin taǵylym retinde Júsip Balasaǵunnyń ómirbaıany jáne danalyq sózderi jazylǵan. Sonymen qatar, ınstıtýt tarıhynan syr shertetin sýretter men oqý ordasynyń tarıhyna qatysty qujattar da mýzeıdiń qundy qazynalarynyń birinen sanalady. Instıtýt rektory Darııa Qojamjarova qurmetti qonaqtardy mýzeı ǵımaratymen tanystyrý barysynda atalǵan orynnyń jastar úshin ashylǵanyn, bolashaq ǵalymdar úshin jasaqtalǵanyn aıtyp ótti. Budan keıin kelgen qonaqtar ınstıtýt ishindegi Qazaqstan Respýblıkasy Tuńǵysh Prezıdenti atyndaǵy májilis zalyn aralap kórdi. Sondaı-aq, Qazaqstan Respýblıkasy Memlekettik syılyǵynyń ıegeri, abaıtanýshy ǵalym Mekemtas Myrzahmetulynyń, Ulttyq Ǵylym akademııasynyń prezıdenti Murat Jurynovtyń, matematık Muhtarbaı О́telbaevtyń jáne ózge de tanymal azamattardyń qatysýymen ınstıtýt aýlasynan Rektorlar alleıasy ashylyp, «Bolashaqqa hat» kapsýlasyn memorıaldy taqtaıshanyń astyna bekitý rásimi ótkizildi.
Budan keıin «Balasaǵun» ortalyq konsert zalynda «Zamanaýı bilim berý tendensııalary: bolashaqqa kózqaras» taqyrybynda Halyqaralyq ǵylymı kongresi uıymdastyryldy. Halyqaralyq ǵylymı kongreske Qazaqstan Respýblıkasynyń Bilim jáne ǵylym mınıstri Erlan Saǵadıev arnaıy qatysyp, Taraz Memlekettik pedagogıkalyq ınstıtýtynyń ujymyn jarty ǵasyrlyq mereıtoıymen quttyqtady. Sondaı-aq, Jambyl oblysynyń ákimi Kárim Kókirekbaev ınstıtýt ujymyn quttyqtaı kele, kóne Taraz shaharyndaǵy aıtýly joǵary oqý ornynyń jetistikterine toqtaldy. Sonymen qatar, shet elderden kelgen professorlar da baıandama jasap, ózara tájirıbe almasý jaǵdaıynda pikir bólisti. Kongress sońynda ınstıtýt túlekteriniń «Urpaqtar sabaqtastyǵy» atty sleti jáne juldyzdy túlekterdiń qatysýymen gala-konsert ótti.
Jalpy, ınstıtýttyń ósip-órkendeýinde, ǵylym jolynda keń qanat jaıýynda ustazdardyń alatyn oryny erekshe. Mereıtoı qarsańynda birqatar úzdik qyzmetkerler «Qurmet» ordenimen, «Y.Altynsarın», «QR Bilim berý isiniń qurmetti qyzmetkeri», «QR ǵylymı damýyna sińirgen eńbegi úshin» tósbelgisimen jáne Jambyl oblysy jáne Taraz qalasy ákimderiniń Qurmet gramotasy, Alǵys hatymen, oblystyq jáne qalalyq máslıhattyń Qurmet gramotasymen, «Nur Otan» partııasy oblystyq fılıalynyń Qurmet gramotasymen jáne oblystyq Kásipodaq uıymynyń gramotasymen marapattaldy.
Sonymen qatar, ataqty ǵalymdar men ustazdar barlyq fakýltetterde «Rýhanı jańǵyrý: Ulttyq kod», «Rýhanı jańǵyrý: HHI ǵasyr ustazynyń kelbeti», «Rýhanı jańǵyrý: latyn álipbıine kóshýdiń tarıhı taǵylymdary, jańa belesteri» jáne «Bilim berýdiń Qazaqstandaǵy trendi» taqyryptarynda master-klass ótkizip, jastarǵa ǵylym men bilimniń jańasha kelbetin túsindirdi.
Hamıt Esaman,
«Egemen Qazaqstan»
Jambyl oblysy
