Búgingi jıynda AО́K-ni damytýdyń memlekettik baǵdarlamasyn iske asyrý barysy talqylandy. Aldymen atalǵan sala boıynsha Aýyl sharýashylyǵy vıse-mınıstri Qaırat Aıtýǵanov, Soltústik Qazaqstan jáne Almaty oblystarynyń ákimderi esep berdi.
Keıin Úkimet basshysy Aýyl sharýashylyǵy mınıstri Asqar Myrzahmetovke aýyl sharýashylyǵy salasyn únemi baqylaýda ustap otyrýdy tapsyrdy.
«Barlyq kórsetkishter boıynsha oń nátıje bar. Degenmen Asqar Isabekuly, siz Elbasynyń qabyldaýynda boldyńyz. Osy saladaǵy barlyq máseleni baıandadyńyz. Elbasynyń tarapynan sizge naqty tapsyrmalar berildi. Osy tapsyrmalardy tııaqnaqty oryndaýymyz qajet. Alda bizdi úlken is-sharalar kútip tur. Bar kúsh-jigerdiń barlyǵyn sonda jumsaý kerek. Ol aýyl sharýashylyǵyndaǵy barlyq salalarǵa qatysty bolyp otyr. Osy jumystardy uıymdastyrýǵa siz jaýap beresiz», dedi QR Premer-Mınıstri.
