Kezdesý barysynda Qazaqstannyń EYDU-men ózara is-qımyl ornatý, elimizdiń ekonomıkalyq ósiminiń jańa modelin qalyptastyrý jaǵdaıynda adamı kapıtaldy damytý, sondaı-aq genderlik teńdikti ilgeriletý máseleleri talqylandy.
G.Ábdiqalyqova Nursultan Nazarbaev tarapynan elimizdiń álemdegi ozyq damyǵan 30 memlekettiń deńgeıine kóterilý jáne EYDU-ǵa múshe bolý mindeti qoıylǵany jóninde atap ótti. Qazaqstan úshin EYDU-men yntymaqtastyq strategııalyq basymdyq jáne ol Básekege qabilettiliktiń eýrazııalyq baǵdarlamasy aıasynda 2008 jyldan bastap júzege asyrylýda.
2015 jyly EYDU-men yntymaqtastyq baǵdarlamasyna qol qoıyldy. EYDU-nyń úzdik tájirıbeleri men usynymdaryn ımplementasııalaý úshin Úshinshi jańǵyrý aıasynda ulttyq Jol kartasy bekitildi, onda 535 usynym qarastyrylǵan.
Qazaqstan memlekettik basqarýdy jańǵyrtýǵa kirisip, konstıtýsııalyq reforma júrgizdi. «Sıfrly Qazaqstan» baǵdarlamasy ázirlenýde. Adamı kapıtaldy damýǵa barynsha nazar aýdarylyp otyr. IýNESKO-nyń «Bilim berýdi damytý ındeksi» boıynsha Qazaqstan 10 jyldan beri álemniń 100-den astam memleketi arasyndaǵy úzdik 8 eldiń qatarynda. Úsh tildilik jáne aǵylshyn tilin keńinen oqytý saıasaty júrgizilýde. Qazaq álipbıin kezeń-kezeńmen latyn qarpine kóshirý josparlanyp otyr. Qoǵamdyq sanany jedel jańǵyrtýǵa baǵyttalǵan «Rýhanı jańǵyrý» jalpyulttyq baǵdarlamasy iske asyryla bastady.
Qazaqstanda genderlik teńdik máselelerine jáne el damýyndaǵy áıelderdiń róline erekshe mán berilip otyr. 2030 jylǵa deıingi otbasylyq jáne genderlik saıasat tujyrymdamasy iske asyrylýda. 2016 jyly Parlamenttiń tómengi palatasy quramynyń 27 paıyzy áıelder boldy.
Sondaı-aq, Memlekettik hatshy Almaty qalasynda Eýrazııa aptalyǵyn ótkizý ıdeıasyn qoldaǵany úshin Bas hatshyǵa alǵys bildirdi. Onyń maqsaty – Ortalyq Azııa jáne EYDU elderinen shyqqan saıası qaıratkerlerdi, halyqaralyq jáne óńirlik uıym sarapshylary men ókilderin biriktirý.
Kezdesý sońynda Memlekettik hatshy G.Ábdiqalyqova halyqaralyq qoǵamdastyqtyń senimdi áriptesi retinde Qazaqstan EYDU-men ózara is-qımyldy odan ári nyǵaıtý baǵytyn jalǵastyratynyn atap ótti.
