Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan ulttyq qundylyqtardy nasıhattaý baǵytynda ótken báıgege 200-den astam júırik at qatysty.
Kókparmen birge alaman báıge, toq báıge, jamby atý, asyq atý, qazaq kúresi syndy ulttyq sport túrleri boıynsha da jarys qyzdy. Mahambet aýdanynda ótken sharaǵa aýdan turǵyndary ǵana emes, oblys ortalyǵynan arnaıy barǵandar da kýá boldy. Toq báıgeden mańǵystaýlyq «Mersedes» tulpary máre syzyǵyn birinshi bolyp kesti. Alaman báıgede Batys Qazaqstannan kelgen «Aımańdaı» ıesine jeńis syılady. «Daraboz-2017» jappaı kókpar jarysynda Jambyl oblysynan qatysýshy Qýanyshbek Quramaev bas báıge – «Altyn qamshyny» ıelenip, 1 mıllıon teńge syıaqymen marapattaldy.
Júırikterdi «Astana» kókpar klýbynyń prezıdenti Amanjol Qasenov pen Atyraýdaǵy ulttyq sport túrleri qaýymdastyǵynyń negizin qalaýshy О́nerbek Janbala baǵalady.
Nóser jaýyn men Atyraýdyń baýyrmal balshyǵy da ulttyq óner jankúıerlerine kedergi bolǵan joq. Jınalǵandar jarysty sońyna deıin tamashalap, etnoaýylda tamasha demalys kúnin ótkizdi. Ulttyq sport ulyqtalǵan sharaǵa oblys ákimi Nurlan Noǵaev pen Ulttyq sport túrleri qaýymdastyǵynyń birinshi vıse-prezıdenti Erlan Ospanov qatysty.
– Atyraýda buryn-sońdy mundaı aýqymdy kókpar oıyny ótpegen, – deıdi oblystyq ulttyq sport túrleri federasııasynyń prezıdenti Aslanbek О́nerbaıuly. – Bastamamyzdy oblys ákimi qoldap, elimizdiń túkpir-túkpirinen eń júırik degen tulparlar jınaldy. Aldaǵy jyly aımaqtyq týrnır ótedi. Ulttyq sportty ulyqtaýǵa arnalǵan sharalar aldaǵy ýaqytta da jalǵasady.
Baqytgúl BABASh,
«Egemen Qazaqstan»
ATYRAÝ
