Qalalyq «Amankeldi» halyq teatry S.Balǵabaevtyń «Biz de ǵashyq bolǵanbyz», Qurmanǵazy aýdany, «Morskoı» selolyq mádenıet úıi janyndaǵy halyq teatry A.Seıdimbekovtiń «Mezgilsiz mahabbat», Maqat aýdandyq mádenıet úıi janyndaǵy halyq teatry B.Jákıevtiń «Júreıik júrek aýyrtpaı» jáne Qyzylqoǵa aýdany «Samal» mádenıet úıi janyndaǵy halyq teatry B.Rımovanyń «Qos muńlyq» dramalaryn qoıyp, úshinshi oryndy teń bólisti.
Al Jylyoı aýdany «Keń Jylyoı» halyq teatry R.Muqanovanyń «Máńgilik bala beınesi» dramasymen, Inder aýdany «Inder – Mádenıet» halyq teatry S.Oljabaıdyń «Qara kózildirikti kelinshek» dramasymen ekinshi júldeniń ıegerleri atandy.
Qurmanǵazy aýdany «Kalının» halyq teatry Á.Taýasarovtyń «Mahabbat araly» qoıylymymen birinshi oryndy jeńip aldy. «Úzdik dekorasııa» nomınasııasy J.Álmashulynyń «Tiri jan» dramasyn sahnalaǵan qurmanǵazylyq «Teńiz» halyq teatryna berildi. «Úzdik er adam róli» nomınasııasy qyzylqoǵalyq Saǵıdolla Iаkypqa, «Úzdik áıel adam róli» ınderlik Gúlzıra Shaýkerovaǵa laıyq dep tanyldy.
R.Muqanovanyń «Máńgilik bala beınesi» dramasyn sahnalaǵan «Keń Jylyoı» halyq teatrynyń rejısseri Nazgúl Jıenbaeva «Úzdik rejıser», Inder aýdanynan kelgen Saıajan Ázıdollaqyzy «Kórermen kózaıymy» atandy.
Baıqaýǵa qazylyq etken QR Mádenıet qaıratkeri Aneta Baetova: «Halyqtyq» teatrlar Atyraý oblysynda jaqsy damyǵan. Bul ónerge degen qurmettiń kórinisi. «Shynaıy shymyldyq» baıqaýy bıyl tórtinshi ret uıymdastyrylyp otyr. Jyldan-jylǵa teatrlardyń talǵamy artyp, repertýarlary tolyǵyp keledi», deıdi.
Baqytgúl BABASh,
«Egemen Qazaqstan»
ATYRAÝ
