Qasym-Jomart Toqaev elimizdiń halyqaralyq arenadaǵy mańyzdy seriktesi sanalatyn EYDU-men yntymaqtastyqqa Qazaqstan aıryqsha mán beretindigin basa aıtty.
«EYDU elderi Qazaqstan boı túzeıtin baǵdar bolyp sanalady», - dedi Q.Toqaev.
Taraptar Qazaqstanmen yntymaqtastyq jónindegi EYDU-nyń eldiń baǵdarlamasyn júzege asyrý jaıyn talqylap, onyń ónimdiligi men talap etiletindigin atap ótti. EYDU-nyń Qazaqstanǵa arnalǵan eldik baǵdarlamasy ekonomıkanyń ınklıýzıvti jáne turaqty ósimi, shaǵyn jáne orta bıznestiń damýy úshin jaǵdaı jasaýǵa, halyqtyń álsiz tobyna qoldaý kórsetýge, sonymen qatar genderlik máselelerdi sheshýge baǵyttalǵan. Eldik baǵdarlama qarastyrylǵan jumystardyń úshten biri áleýmettik máselelerge arnalǵan.
A.Gýrrıa Qazaqstanda júrgizilip jatqan reformalarǵa joǵary baǵasyn berip, EYDU-nyń elimizge qajetti konsýltasııalyq kómek berýge daıyn ekendigin atap ótti. EYDU bas hatshysy Qazaqstanda Eýrazııa aptalyǵyn ótkizýge qoldaý bildirgeni úshin alǵysyn bildirip, uıymnyń parlamenttik jelisi aıasynda yntymaqtastyqty damytýdy usyndy.
Sonymen qatar ol Senat tóraǵasyn uıymnyń parlamenttik segmentiginiń jumysyna qatysýǵa shaqyrdy. Kezdesý sońynda Q.Toqaev Qazaqstan uzaqmerzimdi perspektıvada el ekonomıkasynyń qaryshty damýyn qamtamasyz etý úshin EYDU-ǵa múshe memleketterdiń tájirıbesi men eksperttik áleýetin barynsha paıdalanýǵa nıetti ekendigin aıtty.
