Shara barysynda muǵalimder mektepte qoldanylatyn jańa oqý ádisterin tanystyryp, respýblıkanyń bas basylymyn úzbeı oqıtyndaryn jetkizdi. Redaksııa ókilderi óz kezeginde gazetke jańa aıdarlar men arnaýly better qosylǵanyn, mektep muǵalimderimen ózara yntymaqtastyqqa yntaly ekenin aıtty.
«Egemen Qazaqstan» gazetinde bıyl úlken ózgerister boldy. Gazet kólikte, ushaqta ustaýǵa qolaıly jańa D2 eýro formatyna yqshamdaldy. Dızaıny, maketi ózgerip, barlyq betteri túrli-tústige kóshti. Gazettiń basty oqyrmandary – muǵalimder. Sol sebepti biz «Bilim» men «Tálim» atty arnaıy betterdi ashtyq. Bul aıdar muǵalimderdiń oqytý ádisterin kórsetýge baǵyttalǵan, ári bilim berý salasyndaǵy ózekti máseleler týraly oqyrmandarymyzdy habardar etedi. Urpaq tárbıesine baılanysty óz oı-pikirlerińizdi jazyp, gazetke usynsańyzdar bolady.
Gazettiń taralymy óte úlken, Qazaqstannyń barlyq óńirine, alystaǵy barlyq aýyldaryna jetedi. 200 myńnan astam oqyrmanymyz bar», dedi gazet ókilderi. Muǵalimder qaýymy bul usynysty qýanyshpen qabyldap, respýblıkalyq gazetke materıal usyný múmkindigin aǵartý isin júrgizýdiń myqty quraly retinde atap ótti.
«Muǵalim mamandyǵynyń qadiri qashty. Ata-analardyń shaǵymdary biriniń ústine biri kelip túsedi. Biz kásibimizge burynǵydaı qurmet bolǵanyn qalaımyz. Mektep – kishkentaı búldirshinderdiń ekinshi úıi. Bul úıde bárimiz tatýlyq men birlikte ómir súrgenimiz abzal. Sol sebepti ózekti máselerdi qalyń jurtshylyqqa jetkizýde elimizdiń bas gazetiniń kómegi quptarlyq», dedi osy mektepte 42 jyl ustazdyq etken Zábıla Smaǵulova.
Kezdesý sońynda jýrnalıster mektep ishindegi Abaı Qunanbaıuly men Jambyl Jabaevqa jáne mektep tarıhyna arnalǵan murajaılardy aralap kórdi. Kezdesýge bas basylymnyń shyǵarmashylyq quramynan Súleımen Májet, Qorǵanbek Amanjol, Dýman Anash jáne Erlan Omar qatysty.
Áıgerim ORYNBEK
