«Taýarıh-tamshylar» jınaǵynan oqyrman qazaq halqynyń qalyptasý jáne etnostyq ataýymen memlekettigin qurý tarıhy, bir ortalyqtandyrylǵan kúshti handyq jasaqtaýǵa talpynǵan áreketi, sondaı-aq otarlaný kezeńderi, patshalyq tusyndaǵy azattyq ańsaǵan kóterilister, keńestik dáýirdegi ulttyq-memlekettik mejeleý shyndyqtary, totalıtarlyq kezeńniń qylmysy jáne alashtyq ıdeıanyń ómirsheńdigi jaıynda avtordyń ár jyldary jazyp, merzimdik baspasóz betterinde jarııalaǵan zertteý maqalalary men suhbattarymen tanysa alady.
«Tulǵalar túzgen taýarıh» jınaǵyndaǵy qazaq tarıhynda eleýli orny bar Maqash ákim, Balýan Sholaq, ult-azattyq qozǵalysqa qatysqan Sháıke molda, ult kósemi Álıhan Bókeıhan, keńes zamanyndaǵy memleket, ǵylym, óner qaıratkerleri Jumabek Táshenov, Ramazan Súleımenov, Saýyq Tákejanov, Ahmet Jubanov sekildi belgili tulǵalar, Baıseıit jáne Dinmuhamed Ádilovter, Hansultan Súıinishálın tárizdi saıası repressııa qurbandary, sondaı-aq totalıtarızm dáýirinde oryn alǵan saıası qýǵyn-súrgin tabıǵaty, bastalǵanyna bıyl 80 jyl tolǵan Úlken terror, onyń qasiretti saldarlary týraly zertteý maqalalar elimizdiń kúrdeli shejiresiniń mańyzdy betterin quraıdy.
Uzaq jyldarǵa sozylǵan otarlyq zamannan soń qazaqtyń eldigin tuńǵysh jańǵyrtqan Alashordanyń 100 jyldyǵyna oraı jaryq kórip otyrǵan bul kitaptar zertteýshilerge, tarıhshylarǵa, stýdentter men oqýshylarǵa, barlyq Otan tarıhymen áýestenetinderge, kópshilik qaýymǵa arnalyp otyr.
«Egemen-aqparat»
