Aman eńbekke de, sportqa da erte aralasqan. Júgirgen, uzyndyqqa sekirgen, kúresken, aýdandyq, oblystyq jarystarda beldeskenin jerge alyp uryp, talaı ret jeńis tuǵyryna kóterilgen, ataqty balýan atanǵan. Amannyń talantyn tanyǵan oblystaǵy sport mamandary ony Semeıge shaqyryp, hat ta jazypty. Ol kezde aýyl basshylary úshin azamattyń bolashaǵy emes, aýyldaǵy sharýashylyq, qoıdyń durys baǵylýy, egin men shóptiń durys jınalýy sııaqty qaýyrt tirlik qymbat bolǵan. Amandy Semeıge jiberip qoısa, aýyldaǵy sharýashylyqtyń bir pushpaǵy qısaıyp qalatyndaı kóringen. Sondyqtan oblystan kelgen hatty Amannyń qolyna tıgizbeı, jasyryp qalǵan. Muny endi «sportshynyń baǵyn baılaǵan» deımiz be, ýaqyt ótken soń aıttyń ne, aıtpadyń ne, bir kem dúnıe ǵoı.
Sovhozdyń aýyr jumysy Amannyń densaýlyǵyna keri áser etipti. Dárigerler «bel omyrtqa osteohondrozy» degen qorytyndy jasapty. Jumys-jumys dep júrip densaýlyǵyn qurtyp alǵan Amannyń júrip-turýy da qıyndap ketedi. Dári-dármek, aýrýhana dárigerleri oǵan kómektese almaǵan. Sóıtip, baldaq ustap qalǵan Amanǵa sportqa arqa súıeýden basqa jol da qalmaǵan.
Elý eki jastan bastap Aman sportpen qaıta tabysty. Táýekelge bel býǵan jigerli jigit aǵasy ómirin qutqaryp, keselden aıyqtyratyn birden-bir jol – sportpen shuǵyldaný ekenine ábden kóz jetkizdi. «Ivanovtyń 12 qaǵıdasy» degen saýyǵý erejesin taýyp alyp, sony basshylyqqa aldy. Jyl on eki aı sport jattyǵýlaryn jasady. Qazir Aman aqsaqal ózin sergek sezinedi. Kúndelikti tańǵy bes jarymda aýyldan shyǵyp, saǵat segizge deıin júgirip, dene jattyǵýlaryn jasap qaıtady. Qazir ol kisi 42 shaqyrymdyq qashyqtyqty bes jarym saǵatta júgirip ótedi. Munyń ózi Gınnestiń rekordtar kitabyna engenderdiń kórsetkishimen shamalas kórinedi. Osy Gınnes kitabyna enýge nege talpynys jasamaımyn degen oı Aman aǵamyzdy da mazalapty. Sóıtip ol kisi Almatydaǵy Gınnester ortalyǵyn izdep, taba almaı qaıtypty. Tek «Aıtýǵa ońaı» baǵdarlamasynyń júrgizýshisi Beısen Quranbek qana jyly qabaq tanytyp, «habarlasaıyq» depti.
– 42 shaqyrym qashyqtyqty 70-85 jasta júgirip, jaqsy nátıje kórsetip, Gınnestiń rekordtar kitabyna engen qarııalar bar eken. Áıteýir úmit dúnıesi ǵoı, men de soǵan daıyndalyp júrmin. Qazir osy qashyqtyqty bes jarym saǵatta júgirip ótemin, – deıdi Aman aqsaqal.
Aman aqsaqaldyń osy áńgimesin estip oıǵa qalasyń. Sporttyń densaýlyqqa paıdaly ekenin, onyń artyqshylyǵyn jastar arasynda nasıhattaýdyń birden-bir mysaly – osy Aman Kákimov sııaqty ardagerlerimizdiń ónegeli isterin kórsetý emes pe? Amannyń sporttaǵy talpynysyn, arman-maqsatyn aýdandyq sport uıymdary qalaı estimegen? Estise, Aman qarııanyń sport arqyly aýrýdy jeńe bilgen erligin basqalarǵa úlgi etý sharalaryn uıymdastyrar edi-aý dep te oılaısyń. Áýeli, bir zeınetaqysynan basqa tabysy joq Amandy Almatydaǵy Gınnester ortalyǵyna ertip baryp, jelaıaq qarııalardyń saıysyna qosyp, baǵyn synasa, salamattylyq ómir saltyn nasıhattaıtyn Tarbaǵataı aýdandyq mádenıet jáne sport bóliminiń abyroıy artpasa, kemimes edi.
Hamza SÁTIEV,
Qazaqstannyń Qurmetti jýrnalısi
Shyǵys Qazaqstan oblysy,Tarbaǵataı aýdany
