Merki aýdany, Savva atyndaǵy №9 orta mekteptiń 11-synyp oqýshysy Aıdana Esmaǵambetova óziniń ózgeshe daryn-qabiletimen erekshelengen jas. Oblysta ótken «О́leń – sózdiń patshasy» atty baıqaýda Abaı Qunanbaıulynyń eki júzge jýyq óleńin, úsh poemasy men bes qara sózin jatqa oqyp, bas júldeni ıelengen edi. Sol ýaqytta qarshadaı qyzdyń taýdaı talabyna tańdanbaǵan, tamsanbaǵan adam bolmaǵan. Endi respýblıka boıynsha daryndy 90 úmitker qatysqan alamanda Aıdana Abaı Qunanbaıulynyń 200 jáne Shákárim Qudaıberdiulynyń 118 óleńin, odan keıin úsh poema, onnan asa qara sózdi jatqa oqyp, taǵy da bıikten kórindi.
Aıdananyń ustazy Gaýharaı Jumataeva shákirtiniń este saqtaý qabiletiniń óte joǵary ekenin aıta kele, óleńderdiń túpki maǵynasyna da úlken mán beretinin aıtty. Sóıtip erekshe daryn ıesi Aıdana Esmaǵambetova dástúrli XVIII Abaı oqýlary respýblıkalyq baıqaýynyń jeńimpazy atanyp, Jambyl jeriniń mereıin asyrdy. Ejelden án men jyrdyń mekenine balanǵan Áýlıeata óńiri taǵy bir talantty perzentimen tolyqty.
Rasynda da úsh júzden astam óleń men birneshe poemany qatar jattaý ekiniń biriniń qolynan kele qoımaıtyn is. Sondyqtan da Aıdananyń armany asqaq. Endi talantty jas Abaı men Shákárimniń óleńderin ǵana jattap qoımaı, ózge de qazaq aqyndarynyń shyǵarmalaryn jadyna toqýdy kózdeıdi. Qazaqtyń ádebıetine, ult aqyndarynyń ulaǵatty týyndylaryna qurmetpen qarap qana qoımaı, sanasyna sińirip, jadyna toqyǵan Aıdananyń áli de alar asýy alda.
Hamıt ESAMAN,
«Egemen Qazaqstan»
Jambyl oblysy
