Tabaldyryqtan attaı bere:
– Osy mańnan ótip bara jatyp, redaksııaǵa kire shyǵaıyn dep ádeıi buryldym, – dedi jedeldete sóılep. – Shynymdy aıtsam kóńilim osylaı qaraı tartady da turady. Biz úshin óz úıimiz sııaqty ǵoı. Ony sender jaqsy túsinetin shyǵarsyńdar. Keıde tipti dál osylaı qaraı bet alǵanda, quddy bir ózimdi jumysqa kele jatqandaı sezinetinim bar.
– Jaqsy boldy, aǵa, kelgenińiz, – deımin qýanyp. – Búgin sizge ózim de habarlasaıyn dep otyr edim.
– Jaı ma?
– Baspasózge jazylý bastaldy emes pe?!
– Á-á, ıá, ıá!.. «Egemenge» degen eldiń yqylasy qazir erekshe. Bul eń aldymen, aınalaıyn, el táýelsizdiginiń, Elbasymyzdyń syndarly saıasatynyń arqasy. О́tkende «Baspasózge jazylý kúni» poshtaǵa baryp edik, biraz adam kezekke turyp jazylyp jatqanyn óz kózimizben kórdik.
– Iá. Búgin meniń elektrondy poshtama da mynadaı bir «habarlama» kelipti. Mine, qarańyzshy. «Biraz ýaqyttan beri «Egemenniń» mazmuny ózgerdi. О́te jaqsy baǵytqa qaraı bet aldy. Maǵan ásirese, ádebıet betindegi maqalalar unap júr. Baǵashardyń jazǵandaryna rızamyn. Sizdiń, Aıgúl apaıdyń, Almas Núsiptiń jazǵan dúnıelerin jiberip almaýǵa tyrysamyn», deıdi.
Osy sátte Mamadııar aǵa jymıyp:
– Kim jazypty? – dedi rıza bolyp.
– Qarlyǵa Ibragımova degen qyzyńyzdyń pikiri eken.
– Áp, bárekeldi! Eńbekteriń jana bersin! Endi men de saǵan bir qyzyq áńgime aıtaıyn, tyńda.
– Qulaǵym sizde, aǵa.
– Osy «Egemende» uzaq jyl qyzmet istegen Myńbaı Iles degen aǵańdy biletin bolarsyń?
– Bilem.
– О́zi bir sondaı aq kóńil, aýzyn ashsa júregi kórinetin kisi edi ǵoı. Jumys dese janyn salyp, redaksııa men baspahananyń arasynda shapqylaıtyn da júretin. О́kinishke qaraı ómirden erte ótip ketti. Allanyń isine amal joq qoı endi... Mine, sol Myńbaı aǵańnyń úıindegi Klara apań da bir tamasha adam. О́te kishipeıil, jany taza, naǵyz zııaly. Jas kezinde, paı-paı, óte sulý bolatyn. Daýsy qandaı keremet edi. Klara án salǵanda búkil dúnıe tym-tyrys bolyp, uıyp tyńdap qalǵandaı kórinetin.
Áne, sol apańa qaısybir jyly «Egemendi» bir jylǵa jazdyryp bergenmin. Sodan keıin úıge telefon shalyp tur.
– Aý, Máke, amansyń ba? Qudaı saǵan baq bersin, uzaq ǵumyr jas bersin. Bıyl bizdi gazetke jazdyrǵan ekensiń. Qazir qolyma alyp oqyp otyrmyn. Kóp raqmet, – dep eki kózine jas tolǵandaı kemseńdep qaldy. – «Egemen» bizdiń ómirimizdiń bir bólshegi, kózkórgen, kóńilge ystyq jer emes pe. Búgin úıge «Egemen» kelgende, otaǵasy Myńbaı da kúlimsirep birge kirip kele jatqandaı boldy ǵoı, Máke-aý!..
Mamadııar aǵa áńgimesin úzip, terezege qarap únsiz qaldy. Osy joly óziniń de kóńili tolqyp ketken sekildi. Men de qolymdy qaltama salyp, betoramalymdy izdeı bastadym. О́ıtkeni kóz aldym buldyrap bara jatqandaı...
Nurǵalı ORAZ,
«Egemen Qazaqstan»
