Tarlan

Osy 2011 jyldyń kókteminiń bir kúni ónerdiń, ádebıet, mádenıettiń shyraqshy­syndaı izdengish Qulbek Ergóbek ha­barlasyp, О́zbekáli Jánibekovtiń 80 jyl­dyǵy týraly áńgime qozǵady. Biraz pikir alystyq. Sol áńgime meniń Úkimet bas­shysy Kárim Másimovke arnaıy saýal joldaýyma túrtki boldy. Saýalyma Úkimet basshysynan tómen­degideı jaýap keldi. «Kórnekti memleket jáne qoǵam qaı­rat­keri О́zbekáli Jánibekovtyń týǵa­nyna 80 jyl tolýyna baılanysty 2011 jyly birqatar is-sharalar uıymdas­ty­rý týraly saýalyńyzǵa oraı tó­mendegini habar­laımyn. О́zbekáli Jánibekovtyń ult má­denıe­ti men ónerine qosqan súbeli úlesin eskere otyryp, mereıtoılyq is-sharalar uıym­dastyrý jónindegi usynysyńyzǵa qoldaý bildiremin. Respýblıkalyq deńgeıde bıylǵy jy­ly onyń qalamynan týǵan eki tomdyq «Tań­da­maly shyǵarmalar» jınaǵy men О́. Já­nibekov týraly «Rýh sarbazy» atty estelikter jınaǵy jaryqqa shyǵady. Sonymen qatar, О́zekeńniń ómiri men shyǵarmashylyǵyna arnalǵan derekti fılm túsirilip, aǵymdaǵy jyly res­pýblıkalyq telearnalardyń efırinde kór­setilýi josparlanyp otyr. Bıylǵy jyly Astana qalasynda eli­mizdiń belgili tarıhshylary, etnograf mamandarynyń bas qosýymen О́.Jánibe­kovke arnalǵan ǵylymı-tájirıbelik konferensııa, «dóńgelek ústel» jáne «Ult rýhanııatynyń» taqyrybynda eske alý keshi ótkiziledi. Sondaı-aq, Astanada kezinde О́.Jáni­bekov ózi bas bolyp uıymdastyrǵan «Oty­rar sazy» orkestri, «Adyrna», «Saz­­gen» folklorlyq-etnografııalyq or­­kes­­tri jáne «Altynaı» bı ansam­bli­niń konserti ótkiziledi. Mádenıet mınıstrligine qarasty res­pýblıkalyq mekemelerde de О́zekeńniń me­reıtoıyna baılanysty biraz is-shara­lar uıymdastyrylýda. Atap aıtqanda, Al­ma­tydaǵy Qazaqstan Respýblıka­sy­nyń Ulttyq kitaphanasy men Astana qa­lasyndaǵy Qazaqstan Respýblıka­sy­nyń Ulttyq akademııalyq kitaphana­synda  О́.Jánibekovke arnalǵan kitap kórmeleri men oqyrmandar konferensııa­lary ótedi. Almatydaǵy Qazaqstan Respýblıkasy­nyń memlekettik ortalyq murajaıynda     О́.Já­nibekovke arnalǵan halyqaralyq ǵy­lymı-praktıkalyq konferensııa men kórme uıymdastyrylady. Al, Túrkistan qalasyndaǵy «Áziret Sultan» memlekettik tarıhı-mádenı qo­ryq murajaıynda «О́zbekáli Jáni­bekov – memleket jáne qoǵam qaırat­keri» degen taqyrypta kórme ashylsa, Otyrar memlekettik arheologııalyq qoryq-mu­rajaıy aýdandyq kitaphanalar men murajaı­lar­men birlesip «О́.Jánibekov – memlekettik qaıratker» atty dóńgelek ústel, kórme uıymdas­tyrýdy, mektepterde О́ze­keńniń ómiri men shyǵarma­shy­lyǵyna arnal­ǵan leksııalar oqýdy josparlap otyr. Sonymen birge, Ońtústik Qazaqstan oblystyq ákimdigi tarapynan bıylǵy jyl­dyń naýryz aıynda mereıgerge ar­nalǵan respýblıkalyq aqyndar aıtysy uıymdastyrylǵanyn habarlaımyn. Premer-Mınıstr K.Másimov» 26 mamyr, 2011 jyl.   ....Bizdiń jasóspirim shaǵymyzda komsomol degen jastar uıymynyń qoǵam­daǵy bedeli dúrildep, abyroıy ósip turdy. Komsomoldyń talaby – jaqsy oqý, adal eńbek etý, qýlyq, urlyq, sumdyq, ótirik­shilik sııaqty jaman qylyqtardan aýlaq júrý bolatyn. 14 jasqa tolǵan óskeleń urpaq osy talaptardy taza qabyldap, soǵan umtylatyn. ...О́zbekáli Jánibekov aýdannan Or­talyqqa deıingi komsomol uıymdarynyń jetekshilik qyzmetterinde 15 jyldan astam ýaqyt eńbek etti. Ásirese, 1962-1970 jyldary Qazaqstan komsomoly Ortalyq komıtetiniń birinshi hatshysy qyzmetin atqaryp, jastar uıymyndaǵy qoǵamdyq qaıratkerligimen búkil elge tanyldy. Ult­tyń, Respýblıkanyń múddesin qorǵaı bilýde de О́zekeńniń tulǵasy Ortalyq komsomol komıtetin basqarǵan jyldary aıryqsha kórindi. О́zekeńmen tuńǵysh kezdesýimiz 1970 jyldyń qańtarynda Qazaqstan komso­moly Ortalyq komıtetinde boldy. Árı­ne, О́zekeń úshin ondaı kezdesýler qyzme­tine baılanysty ádettegi ondaǵan, júzde­gen kezdesýler bolatyn. Ol kisiniń aldy­nan men sııaqty qarapaıym qazaqtyń jigitteri lek-legimen, top-tobymen ótip jata­tyn. Sondyqtan ondaı kezdesýler О́zekeńniń esinde qala bermeýi de múmkin. Al men úshin sol kezdesý esten ketpes erekshe oqıǵa. О́ıtkeni, ondaı dárejede meniń tuńǵysh kezdesýim. Ekinshiden, syrtynan atyna qanyq tulǵamen kezdesý. Úshin­shiden, bul tuńǵysh kezdesý – bola­shaq ómirdiń ár qyrynda kezdesip, túsinisip, syrlasyp, qyzmettes te bolyp júrýdiń bastamasy bolǵan shyǵar. Jastar uıymynda qyzmet jasaǵan jyldarymyzda, ol kisi Ortalyq, biz aýdan deńgeıinde júrip, jastarmen tildesip, aralasyp, olardy qoǵamnyń ıgiligine, jaq­sylyǵyna, damýyna, oń baǵytyna jumyl­dyrý jumystaryn úırendik. Komsomol qoǵam tirshiliginiń san salaly ba­ǵytta­rynyń barlyǵyna, mekteptegi oqý­dan bastap, sport, kórkemónerpaz, áskerı-patrıot­tyq, eńbek tárbıesine tikeleı aralasatyn. Kóbine bastamashyl­dyq kór­setetin. Ol kezde komsomoldan ósken aǵa urpaq jastyq shaǵynda komsomol qata­rynda bolǵanyn maqtanyshpen aıtatyn. Sol jyldary jastardyń jalpy bilimmen qatar ártúrli kásiptik, tehnıkalyq bilim alýyna aıryqsha mán berildi. Osy baǵytta qoǵamdy basqarýshy bolǵan Qa­zaqstan Kompartııasy Ortalyq Komıteti men Úkimetiniń arnaıy qaýly-qarar­lary­nyń qabyldanyp, jergilikti jerlerde jas­tardyń oqýyn qamtamasyz etetin jaǵdaı jasalýyna О́zekeń Respýblıka jastar jetekshisi retinde tikeleı bastamashy bola aldy. Qazaqstanda metallýrgııa, taý-ken, energetıka, qurylys, munaı, taǵy basqa ónerkásip keshenderi boı kótere bastady. Komsomoldyń Ortalyq Komıteti solardyń kópshiligin ekpindi komsomol qurylysy sanatyna qosyp, qazaq jastarynyń óner­kásip salasyna mamandanýyna qamqorlyq jasaýǵa tyrysty. Bolashaqta olar­dyń qatarynan myńdaǵan eńbek ardagerleri, ondaǵan, júzdegen óndiris basqarýshylary ósip shyǵyp, qo­ǵamǵa paıdaly eńbek etti. XX ǵasyrdyń basyndaǵy jastar qozǵalysynyń kórnekti qaıratker­leri Ǵanı Muratbaev, Sattar Erý­baevtardyń esimin keıingi urpaq sanasyna jetkizip, tarıhı tulǵalar ómiri men eńbegin syılaý dástúrin qalyptastyrýda О́zekeńniń eńbegi mol. Komsomoldyń óner, ǵylym, má­denıet salasyna da batyl ara­lasyp, jas ta­lanttardyń ósýine tikeleı qamqorlyq jasaý úrdisi de osy О́zekeńniń tusynda qalyptasyp, jaqsy dástúr bolyp, keıingi ke­zeńderge deıin de sátti jalǵasyn taýyp jatty. Ádebıet, óner salasynda Qa­zaqstan Komsomoly syılyǵynyń laý­reaty degen qurmetti ataq týraly sheshim qabyldanyp, onyń alǵashqy laýreaty etip nebári 23 jyl ómir súrip, «Meniń qurdastarym» roma­nyn jazyp ketken Sattar Erýbaevty jarııalady. Móldiregen jas shaǵynda sol ataqqa ıe bolǵan Oljas Súleımenov, Ǵazıza Juba­nova, Ánýar Álimjanov, Qadyr Myr­zalıev, Tumanbaı Molda­ǵa­lıev, Shámshi Qal­daıaqov, Nurǵalı Núsip­janov, Anatolıı Molodov syndy daryndy tulǵalar Qazaq­stan áde­bıetiniń, óneriniń kórnekti qaırat­kerleri bolyp ósti. О́ner sańlaqtarynyń ósýi de, eńbegi de jas urpaq tárbıesine aıryqsha ónege ekenin aıtqanymyz oryndy. О́ner, mádenıet sala­laryn damytýǵa baǵyt­talǵan ártúrli konkýrstar men festıval­darǵa da komsomol bastamashy bolyp, olardyń halyq arasynda tanylyp, maz­mundy ári tartym­dy ótkizilýine mán berilip, keńinen qanat jaıdy. О́zekeń qazaq jastarynyń, ásirese qoǵamdyq ómirimizdiń san alýan salasynyń talantty ókilderiniń Odaq kóleminde tanylyp, nasıhattalýyna aıryqsha kóńil bóldi. Sol úshin aıanǵan joq. Qajet jerinde usynysyn berip, sózin aıtýdan tartynǵan emes. О́zekeńmen sol kezdegi Búkilodaqtyq komsomol komıtetiniń birinshi, ekinshi hat­shylary qyzmetterin atqarǵan Sergeı Pavlov, Evgenıı Tıajelnıkov, Borıs Pastýhov tııanaqty sanasatyn, syılaıtyn. Árıne, onyń bári ońaılyqpen ózdiginen bola bermeıtini anyq. Ondaı dárejege jetý úshin tolassyz eńbek, onyń kórnekti nátı­jesi, qajetpen kóterilgen másele, orny­men aı­tyl­ǵan utymdy sóz, bultartpas dálel jı­naqtalyp baryp, adamnyń qabi­let, qary­myn kórseteri de haq. О́zekeń respýblıka jastar odaǵynyń jetekshisi retinde osynaý bıik talap turǵysynan kórine bildi. О́zekeńniń qoǵam úshin jasaǵan eńbegi, jeke basynyń qaıratkerlik, adamdarmen qarym-qatynastyq qasıetteri myńdaǵan adamdardyń jadynda saqtalyp, kókire­ginde, kóńilinde, kókeıinde óshpes iz qaldyrdy. О́zekeńniń ǵajaby – joǵary laýazymdy qyzmette bolǵanda da, odan ketkende de adamı mineziniń birqalypty bolýy. О́ze­keńe degen el-jurttyń, О́zekeńdi biletin adamdardyń, qoǵamnyń da qatynasy birqa­lypty «О́zeke» degen syılasymdylyq jaǵdaıda boldy. Dúnıeden ozǵanyna on jyldan assa da О́zekeńniń esimi men tulǵasyna sol baıaǵy halyqtyq, ulttyq qurmet sezimi óse túspese, bir mysqal da kemimedi. О́zekeń ultymyzdyń qaıratkeri beınesinde ol kisini kórgen, biletin adamdardyń sanasynda sónbes jaryq sáýle bolyp qaldy. О́zekeńniń ómir joly, ósý joldary ońaı bolǵan joq. Bala kezindegi basynan ót­kizgen jetimdigi, bozbaladan eseıip jigit shaǵynda oqýǵa, bilimge, eńbekke degen izdenisi, talpynysy, odan keıingi úlken ómirge aralasýy týraly О́zekeń óziniń «Taǵdyr taǵylymy» kitabynda tartymdy baıan­daǵan. Komsomol qyzmetinen keıin О́zekeń partııa qyzmetine tartylyp, jańadan qu­rylǵan Torǵaı oblysyna oblystyq partııa komıtetiniń ıdeologııa jónindegi hatshysy qyzmetine jiberildi. О́zekeńniń Torǵaı óńirindegi eńbegi ańyzǵa bergisiz. Sodan beri qyryq jyldan astam ýaqyt ótse de, sol kezderi Torǵaı oblysynda turǵan azamattar erekshe tebirenispen eske alady. Torǵaı ólkesindegi bes jylǵy eńbegi joǵary baǵalanyp, Qazaqstan Kompar­tııasy Ortalyq Komıtetinde jańadan qurylǵan Syrtqy baılanystar bólimine meńgerýshi qyzmetine taǵaıyndaldy. Ol zamanda partııaǵa múshe adamdar, ásirese, basshy qyzmetshiler óz betterimen, tek óz qalaýymen qyzmet tańdaı almaıtyn. Árıne, sheshim qabyldaıtyn quzyrly partııa orny adamnyń mamandyǵyn, tájirı­besin, qabiletin, múmkindigin, minez, qul­qyn, sóz joq, esepteı otyryp, usyny­latyn adammen aldyn-ala áńgime júrgizip, onyń da pikiri eskerilip, jan-jaqty tııanaq­talady. Keıbir usynystardan bas tartatyn da adamdar bolýy zańdy. Al О́zekeń sııaqty qoǵam, Otan isin óziniń jeke basynyń múddesinen joǵary qoıatyn adamdar qandaı qıyn jer, jumys bolsa da partııa senimi dep qabyldaıtyn. Ol nasharlyq emes, erekshe tektilik edi. Keıbir shynaıy qaıratkerlerdiń ómiri de qaıshylyqqa toly, kúrdeli bolady. Onyń sebepterin áldekimder dolbarlap, boljamdap óz paıymdaýynsha aıtyp jata­dy. О́zekeń qandaı qubylysqa da, ártúrli jaǵdaı, máselelerge óz pikiri bar, shyn­shyl, týrashyl, batyl, iri, qaıratker tulǵa. О́zekeń ómiriniń bir ereksheligi – ol kisiniń komsomoldan keıin ylǵı jańa qury­lymǵa jiberilip, kelgen jumysyn túbi­rinen bastap óziniń quryp shyǵýy. Torǵaıǵa barǵandaǵy qyzmeti túgeldeı «alǵashqy ret», «tuńǵysh» degen anyq­taýysh, aı­qyndaýyshpen baılanysty boldy. Odan keıin Ortalyq partııa komıtetine kelgende de Syrtqy baılanystar bólimi jańadan qurylyp, onyń jumysyn bir júıege túsirý Jánibekovke tapsy­ryldy. О́zekeń qysqa merzimde bul tap­syrmany da urshyqsha ıirip, jańa baǵyttyń mártebesin kóterdi. Mádenıet mınıstriniń orynbasary qyzmetine kelgende de qurylymy, uıym­dastyrýy jaǵynan jańa, qajeti men maz­muny jaǵynan erteden kóp zııaly adamnyń kóńilinde júrgen mańyzdy salany qolǵa alyp, onyń naqty, júıeli, josparly túrde júrgizilýin negizdedi. Ol – qazaq halqynyń tarıhy men mádenıetimizdiń tarıhı eskertkishteri, etnografııa, ulttyq dástú­rimiz ben mádenı órkendeý joldary edi. Árıne, laýazym dárejesi turǵysynan О́zekeńniń bilimi, múmkindigi, qaıratkerligi orynba­sardan góri áldeqaıda joǵary ekenin el, qoǵam biletin. Alaıda, joǵaryda aıtylǵan rýhanı ómirimizdiń mańyzdy qazynasy úshin О́zekeńniń sol salaǵa kelip, 6-7 jyl eńbek etýi – qazaq etnografııasy, tarıhı eskertkishteri, salt, dástúri úshin kózi ashy­lyp, kógerip, kóktep, baǵy janǵan jyldar boldy desem, eshqandaı artyq aıtqandyq emes. О́zekeń tuńǵysh ret elimizdegi tarıhı eskertkishterdiń erte dáýirden bastap búginge deıingi tolyq jınaǵyn júıelep, tizimge túsirtip, olardy ońaldyryp, qaıta jóndeýden ótkizilip, qalpyna keltirý qajettigin memlekettik mádenı-rýhanı qun­dylyqtar dárejesine kóterdi. Sol jyl­dary О́zekeńniń bastamashyldyǵymen Qazaqstannyń tarıhı jáne mádenı eskertkishter jınaǵynyń 10 tomdyǵy shyǵa bastady. Bul jerde – Keńes Odaǵy bıliginde «bizdiń tarıhymyz 1917 jyly qazan tóńkerisinen bastalady» degen ýaǵyz ıdeo­logııanyń meńdep turǵan shaǵynda ulttyq mádenıetimizdiń erte zamandaǵy qaınar kózderin tanyp, moıyndaýǵa úlken bet­burys bolǵanyn eske sala ketken de jón. Mádenıet mınıstrligi janynan О́ze­keń­niń tikeleı usynysymen, jobasymen tarıhı-mádenı eskertkishterdi jóndep, áýelgi qal­pyna keltirý, olardy eldiń rýhanı qun­dylyǵyna aınaldyrý maqsatynda «Kazrestavrasııa» ǵylymı-zertteý ıns­tıtýty, ar­naıy basqarma qurylyp, jańa júıeli isterge qamqor boldy. Sol jyldar aralyǵynda osy baǵytta atqarylǵan qyrýar ıgilikti jumys­tardy О́zekeńniń esiminsiz aıtý da, kóz aldymyzǵa keltirý de múmkin emes. Qazaq halqynyń etnografııalyq baı álemin qalpyna keltirip, ulttyq salt, dástúr, sanany jańǵyrtyp, onyń júz­degen bilgirleri men izdeýshilerin ıgilikti jumysqa jumyldyra alǵan da О́zekeń. Sonyń aıǵaǵy – О́zekeń ózi bas bolyp, uzaq jyldar tirnektep júrip, jınaqtap ashqan Almaty qalasyndaǵy respýb­lıkalyq mýzykalyq ult aspaptar mura­jaıy edi. Kezinde ol murajaıdyń ashy­lýy úlken oqıǵa bolǵan. Murajaı jumysymen qatar qurylǵan etnografııa­lyq «Sazgen» jáne Nurǵısa Tilendıevtiń ataqty «Otyrar sazy» ansamblderi de óz naqyshtarymen, óz únderimen dúnıege keldi. Atalmysh murajaıdyń jumysyn jolǵa qoıý aıtýǵa jeńil, shyn máninde taýqymeti kóp, áleýmettik jaǵdaıy joq jumys edi. Sondaı-aq, «Otyrar sazy» ujymy tarıhynyń ózi bólek áńgime. Bul jerde aıtýdyń reti kelip turǵany – Nurǵısa Tilendıev pen О́zbekáli Jáni­bekovtiń birlesip, sol murajaıdaǵy ulttyq aspaptardy úlken ansamblde «sóıletýi» edi. Anaý-mynaý bastyq, she­neý­­nikterge tarpań minez kórsetip júretin Nurekeń (Nurǵısa Tilendıev) О́zekeńmen úndesip, shúıirkelesip ketetin. Murajaı týraly Úkimet qaýlysy bolǵanymen onyń kóp máselesi – atap aıtqanda – ǵımaraty, qyzmetkerlerdiń páteri, shtat kestesi, jalaqy mólsheri, jalpy qarjysy tolyq sheshilmeı jatty. Osynyń bári tııanaqtalyp, Ortalyq komıtettiń birinshi hatshysyna baıan­daldy. Dinmuhamed Ahmetuly sol kezde Ortalyq partııa komıtetiniń ónerkásip isteri jóninde hatshysy Nursultan Ábish­ulymen birge murajaı jaǵdaıymen muqııat tanysyp, sońynan ekeýi birlesip, barlyq muqtajdaryn sheship, naqty qamqorlyq jasady. Nursultan Ábishuly men О́zbekáli Jánibekulynyń rýhanı jaqyndyqtaryn komsomoldan estıtinbiz. Keıin Nursultan Ábishuly respýblıka Ortalyq partııa komıtetiniń birinshi hatshysy bolǵanda da, Prezıdent bolǵanda da О́zekeńe zor qurmetpen qarap, onyń eńbegi men qo­ǵamdyq qaıratkerligin joǵary baǵalap, densaýlyǵy syr bere bastaǵanda qamqor­lyq, kómegin de meılinshe shyn yqyla­symen jasaǵanynyń da kýási boldym. О́zekeń qyzmette de, adamdarmen qa­rym-qatynasta da talǵampaz, talapshyl, kirpııaz. Ásirese «qaǵaz», ártúrli saıası qujattar, baıandamalar, sóz, saıası maqala jazýǵa óte shuqanaq. Ol kisiniń oıyn tabý qyzmetkerlerge ońaı bolmaıtyn. О́zekeń­niń oı-órisi keń, bilimi tereń. Qandaı da jumysqa asqan jaýapkershilikpen ári tyń kózben qaraıtyn. О́zbekáli Jánibekulynyń ǵıbratty isteri kóp-aq. Sonyń eń abyroılysy da, eń ardaqtysy da halqymyzdyń jady men turmysynda saqtalyp qalǵan salt, dástúrleriniń ómirge qaıta oralyp, ult saltanatyna aınalýy. О́zekeń Mádenıet mınıstri, Qazaqstan kompartııasy Orta­lyq komıtetiniń hatshysy bolǵan jyl­dary Naýryz merekesiniń qaıta týyp, jandanyp, jańaryp, memleket ómiri dárejesinde búkilhalyqtyq meıram bo­lýyna tikeleı bastamashy boldy. «Qazaq tili» qoǵamyn quryp, onyń memlekettik til bolý ıdeıasyn qalyp­tastyrdy. О́tken ǵasyrdyń 20-30 jyldary jazyqsyz saıası qýǵyn-súrginge ushyraǵan qazaq halqynyń ult bolashaǵy úshin qurban bolǵan ardaqty arystarymyzdy aqtaý týraly saıası sheshim qabyldaý qajettigin alǵashqy bolyp, ózimizde, áli Odaqtyń shańyraǵy shaıqalmaı turǵanda Máskeýde, Ortalyq bılik dárejesinde kótergen de О́zekeń. Kezinde Peter­bor­daǵy Ermıtajǵa alynyp ketken qazaq­tyń kıeli Taıqazanynyń elge oralýy da О́zekeńniń eńbegimen baılanysty. Sondaı-aq ártúrli saıası tolqyn­dardyń sharpýymen qıratylǵan, sáýlet eskertkishterin qalpyna keltirý isi de О́zekeńniń bastamashyldyǵymen júıeli sıpatqa bet túzedi. Olardyń qatarynda Arystanbab, Qoja Ahmet Iаssaýı, Aısha bıbi, Joshy keseneleri, Jarkenttegi musylman meshiti, Qarqaralydaǵy Qunanbaı meshiti, Uly­taýdaǵy, Ordadaǵy, Syrymbettegi, taǵy basqa tarıhı qundylyqtarymyzdy aıtýǵa bolary haq. Osy maqalanyń basynda keltirilgen Úkimet basshysynyń hatyna sáıkes – ultymyzdyń ardaqty uldarynyń biri О́zbekáli Jánibekovtyń esimin este saq­tap, ony qurmetteýge de memleket tara­pynan jasalyp jatqan qamqorlyqty aıtýymyz ádildik bolar edi. Bıyl О́zekeńniń 80 jyldyǵyna oraı kóptegen sharalar uıymdastyryldy. О́mirden ót­kennen keıingi jyldary BAQ-da О́ze­keńniń ómiri men eńbegi týraly kóptegen estelikter men maqalalar jarııalanýda. О́zekeńniń eńbekteri, kitaptary jaryq kórip jatyr. Solar­dyń ishinde Erkinbaı Ákimqululynyń «Ǵıbrat­ty ǵu­myr» se­rııa­symen shyqqan «О́zbekáli Jánibekov» atty eńbeginiń erekshe qundy­lyǵyn aıt­qan jón. Qara­sha­nyń basynda qaırat­kerdiń týǵan topyraǵy Sháýildirde О́zekeń­niń eskertkishi ashylmaq... О́zekeńdi eske alǵanda, aldymen ol kisiniń qajymas qaıratkerligi, qatań bolsa da ádildigi men adaldyǵy, eljirep turmasa da shynaıy janashyrlyǵy men senimdi baýyrmaldyǵy kóńilińdi shýaqqa bóleıdi. О́zekeń ultjandy qoǵamshyl, patrıot edi. Qoǵamdyq qyzmettiń, adal eńbektiń, memleketke, ultqa sarqyla qyzmet etýdiń tarlany edi. Qýanysh SULTANOV, senator.