О́ńirde áleýmettik kómektiń jańa sıpatyna kóshý úshin tıisti sharalar qyzý júzege asyrylýda. Jobany jergilikti halyqqa túsindirýde aqparattyq-nasıhat jumystary júrgizilip, oǵan arnaıy 36 mobıldi top quryldy. Búginge deıin 700-den astam eldi mekende turǵylyqty halyqpen kezdesýler uıymdastyryldy.
Oblystyq jumyspen qamtýdy úılestirý jáne áleýmettik baǵdarlamalar basqarmasynda kún saıyn mamandarǵa osynaý tyń júıeni túsindirý maqsatynda oqý semınarlar ótýde. Budan bólek, jumyspen qamtý ortalyqtary men áleýmettik baǵdarlamalar bólimderi mamandaryna, aýdan jáne aýyldyq okrýg ákimderine ár toqsan saıyn oqý semınarlary uıymdastyrylýda. Osyǵan deıin óńirdegi 9 aýdannyń mamandary osynaý sharalarǵa qatysyp biliktiligin arttyrǵan. Bul joly Saıram, Saryǵash aýdandaryna kelgen 60 shaqty maman jańasha ataýly kómek kórsetý júıesimen jiti tanysty. Qoıylǵan suraqtarǵa jaýap berip, bilgen-túıgenderin pysyqtady. Kezdesý kezinde 2018 jyldyń 1 qańtarynan iske asatyn jańa formattaǵy ataýly áleýmettik kómek kórsetý tártibiniń ózgerýi túsindirildi.
Aıta keteıik, «О́rleý» jobasy aıasynda búginge deıin jalpy somasy 6 mlrd-tan astam teńge bolatyn shartty aqshalaı kómekti 20 myńnan astam ońtústikqazaqstandyq aldy. Osy jobaǵa qatysýshylardyń 94%-y jumyspen qamtýdyń belsendi sharalarymen qamtylyp, 85%-y turaqty jumyspen qamtyldy. Aǵymdaǵy jyldyń 9 aıynda «О́rleý» jobasyna qatysýshylardyń qatarynda 906 adam óz isin ashyp, jeke kásipker retinde salyq organdaryna tirkeldi. Oblysta «О́rleý» pılottyq jobasyn iske asyrý nátıjesinde, shartty aqshalaı kómek alýshylardyń tabysy 4,2 esege artyp, orta eseppen aıyna 1 adamǵa 23 myń teńgege jetip otyr.
