О́ńirlerdi damytý baǵdarlamasy boıynsha bıyl 55 eldi mekendi aýyz sýmen qamtý jumystary bastalǵan edi. 8 aýylda bul jumystar aıaqtaldy, Kóshim – bıyl taza sý jetkizilgen toǵyzynshy aýyl. Jaqyn kúnderi Zelenov aýdanyndaǵy Shapov aýyly turǵyndary da osyndaı qýanyshqa kenelmekshi.
– Batysqazaqstandyqtar úshin ortalyqtandyrylǵan aýyz sýmen qamtý máselesi óte ózekti bolyp tur. Qazirgi tańda óńirdegi 443 eldi mekenniń 36 paıyzy ǵana taza aýyz sýmen qamtylǵan. Bul – óte tómen kórsetkish. Sondyqtan Prezıdenttiń tikeleı tapsyrmasy boıynsha Úkimet tarapynan 55 eldi mekendi taza aýyz sýmen qamtamasyz etý maqsatynda 11 mlrd teńge bólingen bolatyn. Bul qarjynyń 9 mlrd teńgesi bıyl ıgerildi. Atalǵan jobalar júzege asqan kezde oblys turǵyndarynyń 44 paıyzy taza sýmen qamtylatyn bolady. 12 aýylǵa arnalǵan joba keler jyly aıaqtalady. Qalǵan aýyldar osy jyldyń sońyna deıin taza sýǵa qol jetkizedi, deıdi Batys Qazaqstan oblysynyń ákimi Altaı Kólginov.
Altaı Seıdiruly turǵyndardy taza aýyz sýmen qamtý jumysy keler jyly da júretinin málimdedi. 2018 jyly oblysta taǵy 50 aýylǵa sý tartý jumystary júrgizilmek. Bul jobalardy iske asyrý barysynda jergilikti qurylys materıaldary qoldanylýy shaǵyn kásiporyndar jumysyn shıratyp, ekonomıkalyq ósimge qozǵaý bolǵan, qosymsha jumys oryndary ashylǵan.
Biz sóz etip otyrǵan Kóshim aýylyn sýmen qamtý baǵdarlamasynyń jobalyq quny 198,374 mln teńge eken. Júıeniń sý saqtaǵysh eki munarasy bar. Aýyl ishinde 20 shaqyrym sý qubyry júrgizilgen. Jospar boıynsha jańa sý qubyry jeltoqsan aıynda tapsyrylýy kerek-tuǵyn. Jobanyń bas merdigeri jergilikti «Nıra» JShS mekemesi jumysty mejelengen ýaqytynan buryn ári sapaly atqaryp shyqqan.
– Bizdiń turǵyndar bul mekemeniń jaýapkershiligi mol ujym ekenin biledi. Osydan birer jyl buryn aýylda «Turǵyn úı-kommýnaldyq sharýashylyǵyn jańǵyrtý» baǵdarlamasymen kóp qabatty úılerdi kúrdeli jóndep, eldiń rızashylyǵyna bólengen edi. Endi mine, aýyz sý qubyry qurylysyn sondaı tııanaqtylyqpen atqaryp, kóńilimizdi demdedi, deıdi turǵyndar.
Oblys basshysymen birge sý jańa sý qubyrynyń «qulaǵyn burap», jańa qondyrǵyny iske qosý qurmetine ıe bolǵan aýyl turǵyny, eńbek ardageri Saǵıtjan Begenovtiń bul aýylǵa kelgenine kóp bolmapty. Biraq sýdyń taqsiretin tartyp úlgergen.
– Kóshimge kelgenimizge kóp bolǵan joq. Balalarym Oral qalasyna jaqyn, kúre joldyń boıynda turǵan, bolashaǵy zor aýyl dep tańdap, osy jerden jańa úı saldy. Sýdy kórshilerimizden, jerden qazyp alǵan qudyǵynan alyp paıdalanyp kelgen edik. Endi mine, taza sý úıdiń ishine kelip tur. Ony qosý úshin bir tıyn da tólegenimiz joq – dep qýanady Saǵıtjan aqsaqal.
Zelenov aýdanynyń ákimi Ashat Shaharovtyń aıtýynsha, Kóshim aýylynda 400-den astam turǵyn ortalyqtandyrylǵan sý qubyryna qosylǵan. Jalpy, Zelenov aýdany – oblys ortalyǵyna eń jaqyn ornalasqan, topyraǵy qunarly, óndirisi órkendep kele jatqan óńir sanalady. Aýdanda barlyǵy 68 eldi meken bar. Bıyl munda 5 eldi meken taza aýyz sýmen qamtylsa, keler jyly taǵy 7 aýyldy taza aýyz sýmen qamtýǵa qujattar daıyndalyp jatyr. Ol júzege asqanda aýdan halqynyń 60 paıyzy taza aýyz sýmen qamtylatyn bolady.
Sóz reti kelgende aıta keteıik, Zelenov aýdanynda keler jyly 7 aýylǵa tabıǵı gaz qubyryn tartý da josparlanyp otyr eken.
Qazbek QUTTYMURATULY,
«Egemen Qazaqstan»
Batys Qazaqstan oblysy
