Statıstıkalyq málimet boıynsha, oblystyń barlyq aýyl sharýashylyq sanattaryndaǵy óndirilgen ónim boıynsha da ósim baıqalady. Atap aıtar bolsaq osy jyldyń toǵyz aıynda óńirde 153,4 myń tonna et (tiri salmaqta) óndirildi, bul ótken jylǵymen salystyrǵanda 4,9 paıyzǵa kóp. Al osy ýaqyt ishinde 575,4 myń tonna sút óndirilip, 101,9 paıyzǵa, 254,6 mln dana jumyrtqa óndirilip, 109,6 paıyzǵa artyp otyr.
Munan bólek, mal sharýashylyǵyn damytý maqsatynda jasalynǵan memlekettik «Sybaǵa» baǵdarlamasymen 14 516 bas iri qara, «Altyn asyq» baǵdarlamasymen 26 230 bas qoı, «Qulan» baǵdarlamasy aıasynda 2557 bas jylqy satyp alynyp, mal tuqymy asyldandyrylǵan.
Jalpy agrarly aımaqta osy jyldyń toǵyz aıynda quny 376,5 mlrd teńge bolatyn aýyl sharýashylyǵy ónimi óndirildi. Bul ótken jyldyń tıisti kezeńimen salystyrǵanda 57 mlrd teńgege kóp. О́ndirilgen ónimniń 172 mlrd teńgesi mal sharýashylyǵy baǵytynda bolsa, 203,5 mlrd. teńge kólemindegi ónim egin sharýashylyǵy boıynsha túsken.
